БНХАУ “алцгар” автобусаа туршиж эхэллээ

Өнгөрсөн тавдугаар сард интернетээр хэсүүчлэх болсон Хятадын хачирхалтай автобусны загвар хэрэглэгчдийн сонирхлыг ихээр татсан. Гэвч замын түгжрэлийг бууруулах, нийтийн тээврийг илүү хурдан болгох зорилготой энэ автобус бодит амьдралд хэр зэрэг нийцтэй, машинаар доогуур нь явах ямар байх талаар хариулт байсангүй өдийг хүрэв.

Харин өчигдөр автобусны загварыг гаргасан компани Хебей мужийн Чинхуандао хотод TEB-1 туршилтын автобусаа явуулж эхэллээ. 21 метрийн урттай, 7,6 метр өргөнтэй энэ автобус доогуур нь машин явж болох 2,1 метр зайтай аж.

Нэгэн зэрэг 300 гаруй зорчигч тээвэрлэх TEB-1 автобус зориулалтын зам дээр л явж чадна. Хамгийн анх энэ автобусны концепцийг 2010 онд танилцуулж байсан бол энэ оны тавдугаар сард Бээжингийн олон улсын дэвшилтэт технологийн үзэсгэлэнд олон нийтэд танилцуулжээ.

Хятадын Наньян, Чинхуандао, Шэньян, Тианжин, Жоукү гэсэн таван хотын захиргаа энэхүү автобусыг туршилтаар ашиглахаар компанитай гэрээ байгуулсан бөгөөд тун удахгүй дээрх хотуудад туршилтын загвар явж эхэлнэ.

Эх сурвалж: Verge