Цагдаагийн машин нь хүртэл... ДУБАЙ
Дэлхийн хамгийн өндөр барилгууд, дэлхийн хамгийн том байгууламж доторх цанын бааз, үзэсгэлэнт хиймэл арлууд гээд Дубай хотыг илэрхийлэх олон зүйл бий. Эдгээрийн дундаас Тансаг зэрэглэлийн спорт машинтай цагдаагийн алба хаагчдын тухай та бишгүй л харсан, сонссон байх.
Тэгвэл Bugatti, Ferrarri, Lamborghini хөлөглөдөг тэд дэлхийн хамгийн хурдан машинтай цагдаагийн алба болжээ. Мэдээж хэрэг хаашаа л харна Bentley, Rolls Royce давхиж явдаг Дубайд цагдаа нар мөн л ижил хурдтай машин хөлөглөх нь аргагүй.
Ердөө 77 ширхэг үйлдвэрлэсэн Aston Martin One-77, Bentley Continental GT, хосолмол хөдөлгүүртэй гурван ширхэг Porsche Panamera гээд нийт 14 тансаг загварыг Дубайн цагдаа нар эзэмшдэг.
Харин хамгийн хурдан нь Bugatti Veyron. 407 км/цаг хурдлах хүчин чадалтай энэ машин 16 цилиндр бүхий 1000 морины хүчтэй хөдөлгүүртэй бөгөөд 100 км/цаг хурд авахад 2,5 секунд зарцуулна.
Үүнээс өмнө 370 км/цаг хурдалдаг Lamborghini Gallaroda LP560-4 загварыг албанд ашиглаж байсан Италийн цагдаа нар дэлхийн хамгийн хурдан машинтай цагдаагийн алба байжээ.
Гэхдээ Дубайн цагдаа нар энэ машинуудаа хэн нэгэн Шейхийг хөөж, барьж авахад ашигладаггүй. Харин оронд нь жуулчдын анхаарлыг татаж, хотоо сурталчилдаг.
Түүнчлэн Дубайн цагдаагийн албаны Тээвэр, хамгааллын албаны дарга Султан Аль Марри "Бид эдгээр машинуудаар энгийн иргэд, цагдаагийн алба хаагчдын хоорондын хязгаарыг үгүй болгохыг хичээж байна. Зүгээр нэг машинуудаа харуулахын оронд энд ирсэн жуулчдад Дубай хотын цагдаа хүртэл нөхөрсөг гэдгийг харуулах ёстой” гэжээ.
Үүнээс гадна хүйсийн тэгш байдлыг хангахын тулд эдгээр машинуудын дийлэнхийг эмэгтэй цагдаагийн алба хаагчид унадаг аж. Энэ машинуудыг унах цагдаагийн алба хаагч хоёроос дээш хэлээр чөлөөтэй ярьдаг, хошин мэдрэмж өндөртэй байх ёстой.
Дубайн цагдаагийн алба 2013 оноос анх тансаг зэрэглэлийн спорт машинуудыг хэрэглээнд нэвтрүүлсэн бөгөөд анхны машин нь Lamborghini Aventador байжээ.
