Youtube-ээр дамжуулж Криптог муулах ажиллагаа

Польш улсад тун хачирхалтай нэгэн хэрэг илэрлээ. 2017 оны 12 сард Польш улсын алдартай Youtube-чин 900’000 дагагчтай Marcin Dubiel гэгч крипто уруу ороод хамаг мөнгө алдсан тухай видео хийсэн байна.

Тус видеогоор нэг залуу өөрийн бүх хадгаламжаар крипто худалдана авах бөгөөд эцэст нь бүгдийг нь алдаж дуусна. Мөн тэрбээр хоолны газар найз охинтойгоо болзож, тооцоог криптогоор хийх гэж оролдох боловч тухайн газар нь зөвшөөрсөнгүй. Үүнд найз охин нь уурлаж залуу уруу бэлэн мөнгө шидээд гарж явна. Төгсгөлд нь манай гол дүрийн залууг крипто арилжаанд уруу татаж оруулсан хорон санаат арилжаачин бэлэн мөнгө тоолж инээмсэглэнэ.

Гэтэл энэхүү видеог Польш улсын төв банк $27’000 төлж захиалж хийлгэсэн гэдэг нь илэрсэн байна. 2017 оны 2 сард крипто арилжаа болон олборлолтыг хуулийн хүрээнд зөвшөөрсөн Польш улс төдийлөн крипто мэдээнд гараад байдаггүй. Тус улсын төв банк ийм төрлийн хар PR-нд мөнгө зарцуулсан гэдэг нь өөрсдийн сул дорой байр суурийг илтгэж байгаа бөгөөд төв банкнууд криптовалютнаас айж байгаагийн илрэл боллоо.