Чихэнд биш зүрхэнд хүрсэн “чи минь”
Ч.ГАНТУЛГА
"Эзэнтэй дуу” булангаараа энэ удаад гавьяат жүжигчин, дуучин Т.Ариунаагийн "Чи минь” дууны бүтсэн түүхийг сонирхуулж байна. Энэ дууны үг, аяыг хөгжмийн зохиолч, гитарчин Д.Өлзий-Орших буюу Өөжгий зохиожээ.
Д.ӨЛЗИЙ-ОРШИХ: ХАЙРЫН МЭДРЭМЖЭЭС "ЧИ МИНЬ” ТӨРСӨН
-Дуу хүний чихэнд биш зүрхэнд хүрэх учиртай тул тэр бүтээл мөнх настай байх ёстой гэж би боддог. Хайрын мэдрэмж сэтгэлд минь байсан учир "Чи минь” дуу төрж байлаа. Би нэг өдөр суугаад л дуу хийчихдэг хүн биш. Тэр бүтээлийнхээ төлөө олон өдөр шаналдаг. Анх 1998 онд Сараагийн "Хайрын бурхан” дууг бичсэн юм. Харин үүнээс олон жилийн дараа "Чи минь” дуу төрсөн түүхтэй.
Т.АРИУНАА: ХАНЬДАА ЗОРИУЛСАН ЮМ
-Би дуу бүхэндээ хайртай. Гэхдээ магадгүй "Чи минь” дуундаа илүү ч байж магад. Энэ дууг ханьдаа зориулж чин сэтгэлээсээ дуулсан. Амьдралын минь гэгээн, аз жаргалтай дурсамж бүхэн дуунд минь шингэсэн юм шүү. Тэгэхээр "Чи минь” дууны эзэн нь миний хань. Энэ амьдралаа хамтдаа туулж, инээж, баярлаж, уурлаж, туниж явсан бидний бүх мөч гэгээн юм. Гэхдээ энэ дууг олон гэргий ханьдаа зориулж байгаасай. Тэгвэл бидний дуу мөнх амьдрах юм шүү.
