Эболатай тэмцэхэд 2 тэрбумыг баталсан ч Д.Тэрбишдагва 5 саяыг өгчээ (БИЧЛЭГ)

Сэтгүүлчид хилийн боомтуудад ажиллалаа. Чингис хаан олон улсын нисэх буудалд ажил ёстой зуун задгай жаран хагархай байна. Хил гааль мэргэжлийн хяналт бие биерүүгээ ажлаа чихэж, үл ойлголцсон байдалтай угтан авлаа. Улаан ногоон зурвасын хэрүүлтэй, хугацаа нь дууссан масктай, мөнгө төгрөг олгогдоогүй гэсэн маргаантайгаар сэтгүүлчдийг угтсан тэд дэлхий нийтийг чичрүүлсэн ЭБОЛА вирустэй тэмцэх ямар ч боломжгүй нь харагдаж байна. Нэг өдөрт 2000 гаруй зорчигчдод үйлчилдэг Чингис хаан олон улсын нисэх буудал нь "одоо энэ хавиар нэг шилэн хаалт хийхэд болно, гэсэн ч мөнгө нь олгогдоогүй байна." гэсэн тайлбартай сууж байсан нь үнэхээр түгшүүр төрүүллээ.

УИХ-аас Эрүүл мэндийн сайдад 2 тэрбум төгрөгийн төсөв нэмж олгон ЭБОЛА вирусээс улс эх орноо хамгаал гэсэн үүрэг өгсөн байдаг. Гэтэл энэ мөнгө хаана яваа юунд зарцуулагдаж байгаа нь тодорхойгүй байгаа бөгөөд Улсын онцгой комиссын дарга Д.Тэрбишдагва 5 сая төгрөг шийдэж байгаа сураг дуулдаад тэр нь хэзээ ирэх нь одоогоор тодорхойгүй байна. Тусгаарлах зурвас, зохион байгуулалт 0 байгаагаа тэд хэвлэлийнхнээс нуусангүй.

ОБЕГ-ын дарга Т.Дуламдорж тэргүүтэй халдварт өвчинтэй тэмцэгчид хаа байгаа юу хийж байгаа нь мэдэгдэхгүй байсаар байгаа энэ үед "Баянхонгор аймагт ЭБОЛА бүртгэгдлээ" "Монголд ЭБОЛА гарлаа" гэх мэт цахим орчны мэдээллүүд иргэдийг ихээхэн түгшээж байгааг энд цохон дурдъя.

Монгол Улсруу хамгийн их зорчигчид нийлүүлдэг Бээжингийн нисэх онгоцны буудал халдвар тараах магадлал хамгийн өндөр 97,9% байхад Шадар сайд Д.Тэрбишдагва, Эрүүл мэндийн сайд Н.Удвал, ОБЕГ-ын дарга Т.Дуламдорж нарын хариуцсан ажил онц муу байгаа нь шуугиан дэгдээж байна.

Эх сурвалж: Цаг.мн