Youtube-ийн анхны бичлэг АРВАН нас хүрлээ

Өнөөдрөөс яг арван жилийн өмнө Youtube сайт анхны бичлэгээ байршуулж байжээ. "Би амьтны хүрээлэнд” нэртэй бичлэгийг компанийг үүсгэн байгуулагчдын нэг Жавед Карим хийсэн бөгөөд нийт 20 сая гаруй удаа хүмүүс үзсэн байна.

Секундэд дунджаар 96,000 хүн ханддаг энэ сайт өнгөрсөн хоёрдугаар сарын 14-ний өдөр арван жилийн ойгоо тэмдэглэсэн. Чад Харли, Стив Чен, Жавед Карим гэх гурван залуу бичлэг хуваалцах сайт байгуулахаар шийдсэний ачаар бид хамгийн багаар бодоход дуртай дуугаа энэ сайтаас сонсож байна.

Тэгэхээр анхны бичлэг нь маш чухал ач холбогдолтой гэсэн үг. Та бичлэгийг үзээд интернет орчин аравхан жилийн дотор яаж өөрчлөгдсөнийг харж болно. Энэхүү бичлэг тавигдаж байхад Facebook дөнгөж л дэлхий даяар үйл ажиллагаагаа явуулж эхэлсэн, Твиттерийн сураг ч гараагүй байсан билээ.

Тэдний тухай сонирхолтой баримтууд

•    Секунд тутамд Youtube-д нэг цагтай тэнцэх хэмжээний бичлэг хуулагддаг
•    Хүмүүс өдөрт дөрвөн тэрбум бичлэг үздэг
•    Сард давтагдаагүй тоогоор 800 сая хэрэглэгч сайт руу ордог
•    2011 онд Youtube сайт дээрх бичлэгүүдийг нэг их наяд удаа үзжээ
•    Twitter-ийн хэрэглэгчид минутад дунджаар 700 Youtube бичлэг хуваалцдаг