Аваргуудын эзгүйд хэн түрүүлэх вэ

Мэргэжлийн сүмогийн Аки башё өнөөдөр дөрөв дэх өдрөө үргэлжилнэ. Энэ удаагийн башёд хоёр их аварга болох Их аварга Хакүхо, Их аварга Харүмафүжи нар барилдахгүй тул ихээхэн онцлогтой, үзүүр түрүүнд хүрч барилддаг сүмочдод томоохон боломж гарч байна гэсэн үг. Их аварга Хакухо эхний хоёр өдрийн барилдаандаа дараалан өвдөг шороодож шуугиулсан. Ингээд гэмтлийн улмаас энэ башёг өнжихөөр болсон тухайгаа мэдэгдсэн юм.

Тэгвэл их аварга Хакухог унагасан маэгашира Ёшиказе өчигдөр Какүрюү М.Анандыг мөн өвдөг шороодуулж шуугиулаад авлаа. Ингэснээр Ёшиказе хоёр аваргыг дараалан унагааж томоохон сенсаци дэгдээв.

Харин манай залуу озеки Тэрүнофүжи Г.Ган-Эрдэнэ Оосүнарашиг даван тэргүүлэгчдийн эгнээнд явж байна.Ичиножёо А.Ичинноров Такаясүг давснаар хоёр даваа нэг унаатай болж байгаа юм.

Японы озеки нараас Кисеносато гурав ялаад байгаа бол бусад нь өчигдөр унаж япончуудын найдлагыг алдаж байна. Түрүү сард сайн барилдсан Точиозан ч энэ сард бас сайн барилдаж байгаа. Эхний гурван өдөр дөрвөн бөх өвдөг шороодоогүй барилдаж байна.

Одоо Аки башед хэн түрүүлэх вэ гэсэн асуулт бөх сонирхогчдын анхаарлыг ихээр татаж байгаа. Их аварга Какүрюү М.Ананд ганцаараа зүүнийг магнайлж бөхчүүдээ ахалж барилдаж байгаа ба ёкозүна цол хүртсэнээсээ хойш түрүүлж амжаагүй байгаа түүний хувьд энэ башё том боломжийг олгож байна хэмээн Японы хэвлэлүүд бичиж байна. Энэ башёд л түрүүлж чадахгүй юм бол Какүрюү их аварга гэсэн цолыг хадгалж авч яваххэрэг байна уу хэмээн тэд бичжээ.

Ингээд хоёр дахь түрүүгээ хүртэхийн төлөө тэрбээр хичээх биз ээ.

Мөн хүчтэй өрсөлдөгчийн тоонд ороод байгаа озэки Тэрүнофүжи Г.Ган-Эрдэнэ хоёр давж тэмцээнээ амжилттай эхлүүлсэн. Мөн л хоёр дахь түрүүгээ хүртэхийн төлөө тэрээр энэ башёд хичээж байгаа.

Харин манай бас нэг найдвар Ичиножёо А.Ичинноров. Тэрээр барилдаандаа сайн анхаарч барилдвал ямар ч амжилт үзүүлэх боломжтой. Кёкүтэнхогийн төрсөн өдрөөр эхэлсэн Аки башё Монголчуудын амжилтаар өндөрлөж Асашёорюү аваргын төрсөн өдрөөр Эзэн хааны цом хүртэхийн ерөөл дэвшүүлье.