Өөрөө найруулж, ижил хүйстний дүрд тоглосон кино үзэгчдийн хүртээл болж байна
Найруулагч Б.Үйзэнмаагийн "Над руу битгий ингэж хар” уран сайхны кино кино театруудын дэлгэцнээ энэ сарын 20-ны өдрөөс гарч эхэлжээ. Эмэгтэйчүүдийн мөн чанарыг ижил хүйстний дүрээр зоримог илэрхийлсэн энэхүү кино нь олон улсын кино шүүмжлэгчдээс өндөр үнэлгээ авсан юм.
Б.Үйзэнмаа нь 1984 оноос Германд амьдарч, Мюнхений кино телевизийн дээд сургуулийг төгсчээ. 2007-2011 онд дээрх уран бүтээлээс гадна гурван кино бүтээсэн байна.
Өөрөө найруулж, гол дүрийг нь бүтээсэн "Над руу ингэж битгий хар” (Schau mich nicht so an) киногоороо Баварийн кино урлагийн наадмаас "Шилдэг залуу найруулагч”-ийн шагналыг хүртсэн билээ.
Мөн өнгөрөгч гуравдугаар сард Японы Осака хотод болсон Азийн кино наадамд найруулагч Б.Үйзэнмаа энэхүү бүтээлээрээ оролцож, "Most promising talent award” шагнал, "Кино шүүмжлэгчдийн олон улсын холбоо"-ны шагнал, Испанийн Таррагона хотод болсон REC олон улсын кино наадмаас "Өвөрмөц санаа" шагналыг тус тус хүртэж байв.
Авъяаслаг уран бүтээлчийн энэхүү кино энэ оны 6 дугаар сарын 16-ны өдрөөс эхлэн Германы 30 гаруй хотын кино театруудаар гарч эхэлсэн бөгөөд одоо эх орныхоо үзэгчдэд хүрч эхэллээ.
Дашрамд сонирхуулахад "Над руу ингэж битгий хар" киноны постерийн зургийг түүний аав, зураач Ч.Борхүү зурсан аж.
Киноны агуулга:
Ганц бие бүсгүй Хеди ѳѳрийгѳѳ бусдаас илүүд үздэг, дураараа байхыг эрхэмлэдэг, эрх мэдлээ үргэлж харуулах хүсэлтэй нэгэн. Тэрээр таван настай охинтой танилцаж улмаар охины ээж Еватай үерхэж эхлэх бѳгѳѳд удалгүй хоёр бүсгүй найз нѳхѳрлѳлѳѳс давж бие махбод, сэтгэл зүрхний нандин холбоо хайр дурлалын харилцаа үүсгэнэ. Харин Евагийн аав ирснээр хоёр бүсгүйн харилцаанд ан цав үүснэ. Энэхүү зѳрчил хэнээс хэрхэн үүссэн тухай, талууд яаж энэ бүх асуудлыг ѳѳр ѳѳрсдийн зүгээс даван туулах гэж оролдож буйг киноны цаашдын үйл явдал харуулна.
