Blue Origin-ын амжилттай туршилт

Энэ долоо хоногт Amazon-ыг үүсгэн байгуулагч Жефф Безосын байгуулсан Blue Origin компани тун чухал туршилт хийсэн юм. Ослын үед зорчигч сууж яваа бүхээгийг аюулгүй зайлуулах системийг туршиж, ирээдүйд гарч болзошгүй эрсдэлээс сэргийлэх ажлыг тэд хийсэн.

Азаар New Shepard хөлгийн зайлах систем амжилттай ажилласан төдийгүй, Техасын цөлд унаж сөнөх байх гэж таамаглаж байсан пуужин нь хэвийн газардсан юм.

Пуужин хөөрснөөс 45 секундийн дараа ослын системийг ажиллуулж, зорчигч бүхий бүхээг хоёр секундийн дотор их биенээсээ салж, шүхрээ дэлгэн, аюулгүй газарджээ.

Хэдийгээр пуужин гэмтээгүй ч дахин ашиглахгүй, харин оронд нь музейд байрлуулах юм. New Shepard хөлөг зургаа хүртэлх зорчигч суулгаад дэлхийн гадаргаас 100 километрийн өндөрт гарч, хэдэн минут болоод эргэж газардах зориулалттай.

Компани 2018 он гэхэд эхний зорчигчдыг аялуулахаар төлөвлөж байгаа бөгөөд одоогоор ямар үнэтэй байх нь тодорхойгүй юм.