35 тонн аюултай тоглоом хураажээ
Франкфуртын нисэх буудлын ажилтнууд Хятадын 35 тонн спиннер тоглоомыг хураасан байна. Энэхүү шинэ загварын тоглоомыг Хятадаас хууль бусаар Герман руу нэвтрүүлэхийг оролдсон аж.
Уг тоглоомууд зөвшөөрлийн бичиггүй байсан бөгөөд спиннерийг аюултай тоглоом хэмээн сэрэмжлүүлээд байгаа билээ. Энэ тоглоомоор наадаж байсан хэд хэдэн хүүхэд золтой амь алдаагүй талаар GQ мэдээлжээ.
Германы гаальчдын өгүүлснээр, туршилтын ажиллагааны явцад спиннер тоглоом найдвартай бус нь илэрсэн гэжээ. Уг тоглоомын жижиг эд ангиуд амархан мултарч байсан нь бага насны хүүхэд залгих аюултайг илтгэж байгаа аж.
АНУ-ын хоёр охин энэхүү тоглоомын жижиг хэсгийг залгин, хоолойд нь тээглэсний улмаас мэс засал хийлгэсэн тухай өмнө нь мэдээлж байсан билээ. Гарынхаа хуруунуудаар хурдтай эргэлдүүлж нааддаг энэ тоглоом өнгөрөх хавар зөвхөн хүүхдүүд гэлтгүй, насанд хүрэгчдийн дунд ч ихээхэн дэлгэрч байсан юм.
