MX Vertical загварын хулгана гарын бугуйг зөв байрлалд оруулна

Компьютерын эд анги, дагалдах хэрэгсэл үйлдвэрлэгч Швейцарийн "Ложитэк” компани компьютерын босоо хэлбэрийн бүтэцтэй анхны хулганаа бүтээж, танилцуулсан байна. Уламжлалт аргаар түлхүү ашигладаг хэвтээ хэлбэрийн бүтэцтэй хулганатай харьцуулахад "MX Vertical” нэртэй тус хулгана нь гарын бугуйг зөв байрлалд оруулдаг ач холбогдолтой хэмээн онцолжээ.  

Энэ хулганыг компьютерийн дэлгэцний ард удаан хугацаагаар суудаг программист болон геймеруудад илүү тохиромжтой бүтээл хэмээн мэдээлсэн. Аливаа хүн урт, богино хугацаанаас үл хамааран компьютерийн ард суухад үргэлж хулганатай харьцаж байдаг. Бидний өдөр тутамдаа хэрэглэдэг энгийн зориулалтын хэвтээ бүтэцтэй хулгана хүний гарын бугуйнд бага зэрэг ачаалал өгдөг байна. Энэ нь даамжраад бугуйн яс, мэдрэлд сөргөөр нөлөөлдөг үр дагавартай гэж мэргэжилтнүүд үздэг.

Харин энэ харагдаж байгаа хулгана энэ асуудлыг шийдэж өгсөн гэдгээрээ онцлогтой. Гэхдээ яг ийм төрлийн хулгана аль хэдийнээ зах зээлд нэвтэрч, хэрэглэгчдийн танил хэрэгсэл болчихсон ч гэлээ Ложитэк компанийн зохион бүтээгчдийн урласан хулгана гэдгээрээ анхаарал татаж байгаа юм. Энэ нь илүү шинжлэх ухааны ул суурьтай, мэргэжлийн хүмүүсийн судлаачдын туршилтын үр дүнд гарч ирсэн хэлбэр хийцийг шингээж өгсөн гэсэн үг. "MX Vertical” хулгана 79 / 78,5 / 120 мм-ийн хэмжээтэй, 135 гр жинтэй. Гарын сарвууны байрлалд тохируулж хулганы товчлуур бүхий тавцанг 57 хэмийн налуу байдлаар хийж өгсөн. Энэ нь ихэнх тохиолдолд энгийн хулганаас бугуйн дирдэг ачааллыг 10 хувиар бууруулдаг юм байна.

Үндсэн хулгана нэг, хоёр гэсэн товчлуур болон голын эргүүлдэг хэсэгтэй мөн дээрээс нь программчдад зориулсан хялбарчилсан үйлдлийг гүйцэтгэх үүрэгтэй нэмэлт 2 товчлууртай. Хийгдсэг материалын хувьд гэвэл хөнгөн цагаан болон зөөлөн чанарын резинээс бүрдсэн. Утасгүйгээр ажилладаг. USB оролтоор цэнэглэнэ. Цэнэг нь дүүрсэн тохиолдолд 4 сарын турш ажиллах боломжтой юм байна. Logitech MX Vertical – хулгана энэ сараас 99,99 ам.доллараар худалдаалагдаж эхэлжээ.