Наймдугаар сараас хойш эзнээ хүлээж буй нохойны бичлэг цахим сүлжээнд таржээ

80 гаруй өдөр эзнээ зам дээр хүлээж буй нохойны зураг, бичлэг Хятадын цахим ертөнцөд олны анхаарлыг татаад байна.

Түүний эзэн Өвөр Монголын Хөх хотод наймдугаар сарын 21-нд нас барсан бөгөөд тус зам дээр нохой нь өдөр бүр ирж эзнээ хүлээдэг аж.

Таксины жолооч болон зам дагуу өнгөрч буй хүмүүс нохойд туслахыг хүсдэг ч ойртохоор зугтаад явчихдаг гэнэ.

Тус бичлэгийг 11-р сарын 10-ны өдөр авч, Хятадын цахим сүлжээ болох Weibo-д тавьжээ. Weibo-гийн хэрэглэгчид нохойны үнэнч байдлын тухай санал бодлоо илэрхийлсээр байна. Тухайлбал нэг хэрэглэгч "Хүний хамгийн үнэнч найз бол нохой. Манай гэр бүл нохойтой байсан. Өдөр бүр сургуулиас ирэхэд минь тосдог байж билээ” гэжээ.

Гэхдээ энэ нь Хятадад шуугиан тарьж буй анхны тохиолдол биш юм. Энэ жилийн эхээр Xiongxiong нэртэй нохой эзнээ галт тэрэгний буудал дээр өдөр бүр хүлээдэг байсан нь олон нийтийн сүлжээнд мөн тарж байв.

80 өдөр эзнээ хүлээнэ гэдэг урт хугацаа юм шиг боловч олон жил эзнээ хүлээн түүхэнд нэрээ үлдээсэн үнэнч ноход бий .

Тухайлбал 1920 оны үед Японд байсан Хачико нохойны түүх олны сэтгэлийг ихэд хөдөлгөсөн. Хачико есөн жилийн турш эзэнтэйгээ уулзахын тулд өдөр бүр галт тэрэгний буудал дээр ирдэг байсан юм.

Эх сурвалж: BBC