Гэр бүлийн хүчирхийлэл хэрхэн төгсдөг вэ? /видео/

Гэр бүлийн хүчирхийлэл хэмээх үг хэллэг хаа сайгүй яригдаж хэлэлцэгдсээр олон он жилийг үдсээр байна. Өнөөгийн нийгмийн хар бараан сүүдрүүдийн нэг болсон энэхүү асуудлын шийдэл төдийлөн үр дүнгээ өгөхгүй байгаа нь хэвлэл мэдээллийн хэрэгслүүдээр байнга чих дэлсэх болсон хар бараан мэдээнүүдээс тодхон харагдана. Сүүлдээ олон нийт ч иймэрхүү үзэгдэлд дөжрөх хандлагатай болсон гэхэд хилсдэхгүй.

Саяхны жишээ л гэхэд, төрсөн эцгийнхээ гарт онц хэрцгийгээр хөнөөгдсөн дөрөвхөн настай охины тухай нийгэм даяараа шуугин, гэрэлт зултай арга хэмжээ хүртэл зохион байгуулсан билээ. Гэтэл хэдхэн хоногийн өмнө гуравхан настай бяцхан хүү мөн өөрийн эцэгтээ сандлаар цохиулан амь насаа алдсан. Энэ талаар хэвлэлээр мэдээлээд өнгөрснийг бид санаж байгаа.

Энэ мэтчилэнгийн булай үйлдлүүд нийгэмд гарсаар байхад бид нүдэн балай, чихэн дүлий өнгөрөөгөөд баймааргүй байна. Гэр бүлийн хүчирхийлэлд хамгийн түрүүнд хүүхэд, эмэгтэйчүүд өртөн золиос болж байгааг анхааран, хууль эрхзүйн баримт бичигтээ яаралтай шинэчлэл хийхгүй бол иймэрхүү эмгэнэлт явдлууд газар авсаар байх нь!

Доорх баримтат киног бүтээгчид нийгмийн энэ эмзэг сэдэвт чиглэсэн бүтээл гаргасныг олны сонорт хүргэхээр толилууллаа. Бүх шатны эрхтэн дархтнууд үүнийг олж үзээсэй хэмээн чин сэтгэлээсээ хүснэм!