“Лалын улс”-ынхан Их Британийн таван иргэнийг хөнөөж буй бичлэгээ цацав
"Лалын улс" хэт даврагчдын бүлэглэлийнхэн Их Британийн таван иргэнийг тагнуул хийсэн хэмээн буруутгаж цаазалж буй 11 минутын бичлэг цацжээ. Тус бичлэгт их британи аялгатай нэгэн этгээд, хүү хоёрын яриа гарч, Их Британийн Ерөнхий сайд Дэвид Кэмеронд хандан тус улсад халдлага үйлдэнэ хэмээн заналхийлсэн байна.
"Буруу номтнууд”-ыг хөнөөж байгаа хэмээн ярьж буй хүүгийн дүрсээр үргэлжилдэг тус бичлэг баттай эсэхийг хараахан нотлоогүй байгаа аж. Их Британийн Гадаад хэргийн яамнаас тус бичлэгийг шалгаж эхэлсэн талаар мэдэгджээ. Гартаа буу барьж, баг зүүсэн жихад эр "Лалын улс” хэт даврагчдын бүлэглэлийн "сүр хүчинд эргэлзэж зүрхэлсэн" хэмээн Дэвид Кэмероныг буруутган, газар нутагт чинь халдана хэмээн заналхийлсэн байна.
