Эль-Класико Мессигийн ноёрхол дор өндөрлөв
Испанийн Ла Лигийг чимдэг Эль-Класикогийн тоглолт өчигдөр боллоо. Энэ 2 баг нийтдээ 230 удаа тааран тоглоход Эзэн хааны баг 92 удаа , Каталончууд 90 удаа хожсон ба 48 удаа тэнцсэн үзүүлэлттэй байлаа.
Эль Класиког орон орны 560 сая иргэд үзсэн тооцоо гарчээ. "Сантьяго Бернабеу" цэнгэлдэхэд явагдсан тоглолтонд Реал хожих юм бол 2012 оноос хойш лигтээ түрүүлэх боломжтой хэмээн бүх мэргэжилтэнүүд дүгнэж байсан. Гэвч тэд Лео Мессигийн золиос боллоо. Тоглолтын эхний гоолыг Касемиро 28 дахь минутад хийн "Сантьяго Бернабеу" цэнгэлдэхэд цугласан хөгжөөн дэмжигчдээ баярлуулав.
Гэвч Месси тэднийг удаан баярлуулсангүй. Ердөө таван минутын дараа тэнцээний гоолыг хийсэн. Хоёр багийн тун өрсөлдөөнтэй үргэлжилсээр Барсагийн И.Ракитич багийнхаа хоёрдахь гоолыг 73 дахь минутад хийн багтаа давамгайлал авчирлаа. Реалаас Хамес Родригес 85 дахь минутад тун чухал гоол оруулан тэнцээ авчирсан ч Мессигийн Эль-Класикогийн 92 дахь минутад оруулсан хожлын гоол Реал Мадридыг хүнд байдалд орууллаа.
Мессигийн хийсэн хоёр гоол нь Каталоны багийн төлөөх 500 дахь гоол болсон юм. Ингэснээр Ла лигийн хүснэгт Реал Мадрид Барселона багуудын оноо тэнцэн 75 боллоо. Чанарынхаа үзүүлэлтээр Барса тэргүүн байранд бичигдэж байгаа ч Реал нэг тоглолт дутуу байгаа юм. Имй учраас тус багуудын лигийн сүүлийн тоглолтууд тун ширүүн өрсөлдөөнтэй болно.
