Элон Маскийн эгэл бус шийдэл

Өнгөрсөн долоо хоногт цацагдсан доорх бичлэгийг үзсэн бол та дахиж энгийн замаар давхих хүсэлгүй болсон байх вий. Элон Маскийн ирээдүйн зөгнөл болох газар доогуурх тээврийн шийдэл түүний ээлжит нэгэн гэнэтийн бэлэг болсон юм.

Тэрээр Ванкуверт болсон TED чуулганы үеэр өөрийн шинээр үүсгэн байгуулсан "The Boring Company”-ийн /Өрөмдлөгийн компани/ сонирхолтой төслийг танилцуулжээ. Recode сайтад бичсэнээр "Энэ газар доогуурх зам хэдэн ч давхар байж болно. Хамгийн гүн уурхай гэхэд хамгийн өндөр барилгаас ч өндөр байдаг шүү дээ” гэсэн юм.

Маск анх Лос Анжелесын түгжрэлд бухимдахдаа энэхүү санаагаа олжээ. Түүний танилцуулсан бичлэгт Теслагийн автомашиныг тусгай зориулалтын зогсоолоос доош газар доогуурх зам руу оруулж, 200 гаруй км/цагийн хурдтай тээвэрлэж буйг харуулсан юм.

Сонирхолтой нь Tesla, SpaceX, Neuralink гээд олон төсөл дээр завгүй ажиллаж буй Маск энэ шинэ төсөл түүний цагаас ердөө 2-3 хувийг хумсалж байгаа гэжээ.

Учир нь ажлын ихэнхийг дадлагын ажилтнууд нугалж байгаа аж. Одоогийн байдлаар зөвхөн бичлэг дээр гарч буй мэдээлэл л олон нийтэд нээлттэй байгаа бөгөөд компанийн албан ёсны цахим хуудсанд цаашид шинэ мэдээлэл оруулж байх юм байна.

Сэтгүүлч А.Ихсанаа | GoGo.mn