Тэнэмэл муур загварын шоун дээр од болов

Туркийн Истамбул хотод зохиогдсон Esmod International Fashion Show загварын шоуны үеэр нэгэн муур загвар өмсөгчидтэй хамт тайзан дээр алхаж од болжээ. Энэ амьтан олны анхаарлыг загвар өмсөгчдөөс илүүгээр татсан байна. Эхлээд муур юу ч болоогүй юм шиг хэвтээд нүүр ам, цавиа долоож байсан бол сүүлдээ тэсэлгүй тэдэнтэй хамт хөл нийлүүлэн алхалж гарчээ. Мэдээж зүгээр байсангүй. 

Хажуугаар нь өнгөрөх загвар өмсөгчдийн хормой хотноос зуурч дэггүйтсэн аж. Истамбул хот Муурны хот гэж нэрлэгдэх бүрэн эрхтэй билээ. Тус хотын гудамжаар энэхүү сэгсгэр үстэй амьтад ямар ч айдасгүйгээр сэлгүүцдэг юм. Хүмүүс тэднийг халамжилж, хоол ундаар тасалдаггүй. Зөнч Мухаммедийн үеэс л лалын шашинтнууд муурыг дээдэлж ирсэн гэдэг. Мухаммед энэ амьтанд үнэхээр сайн байсан аж.