БОУАӨЯ, Даян дэлхийн газрын санаачилга (GLI20) байгууллагатай хамтын ажиллагааг эхлүүллээ

2025 оны 6 дугаар сарын 5-ны өдөр Байгаль орчин, уур амьсгалын өөрчлөлтийн яам (БОУАӨЯ)-ны төлөөлөл Даян дэлхийн газрын санаачилга (Global Land Initiative, GLI)-ын Гүйцэтгэх захирал доктор Мурали Туммаракудиг хүлээн авч уулзан, цөлжилт, доройтол, нөхөн сэргээлтийн чиглэлээр хамтын ажиллагааг өргөжүүлэхээр санал нэгдэв.

• Газрын доройтлыг бууруулах, нөхөн сэргээх чиглэлээр чадавх бэхжүүлэх: "Land Academy” буюу нөхөн сэргээлтийн мэргэжилтэн бэлтгэх төв байгуулах, их, дээд сургуулиудад сургалтын хөтөлбөр нэвтрүүлэх.

• Хамтарсан төсөл, судалгаа: Хан Хэнтий, Говь-Алтай зэрэг бүс нутагт нөхөн сэргээлтийн загвар төсөл хэрэгжүүлэх, G20-ийн шинжээчдийн оролцоотой судалгаа хийх.

• Хууль эрх зүйн дэмжлэг: "Цөлжилттэй тэмцэх тухай хууль”-ийн төслийг боловсруулахад туршлага солилцох, хууль боловсруулагчдыг холбогдох сургалтад хамруулах.

• Бизнес ба иргэний нийгмийн дэмжлэг: Газрын нөхөн сэргээлтийн чиглэлээрх стартапуудыг олон улсын хөрөнгө оруулалт, сүлжээнд холбох, жижиг ТББ-ыг санхүүжилтэд хамруулах.

• Боловсрол ба залуусын оролцоо: "Загвар НҮБ” хуралдаан, гэрэл зургийн уралдаан хамтран зохион байгуулах, шилдэг оролцогчдод COP17-д оролцох боломж бүрдүүлэх.

• UNCCD COP17-ийн бэлтгэл: 2026 онд Монгол Улсад болох НҮБ-ын Цөлжилттэй тэмцэх конвенц (UNCCD) -ын Талуудын 17 дугаар бага хурлын хүрээнд "Land Restoration Pavilion” үзэсгэлэн хамтран зохион байгуулах.

Доктор Мурали Туммаракуди нь өмнө нь НҮБ-ын Байгаль орчны хөтөлбөр (UNEP)-т ахлах мэргэжилтнээр ажиллаж, 35 гаруй орны газрын нөхөн сэргээлт, байгаль орчны менежментийн үйл ажиллагааг удирдан зохион байгуулж байсан туршлагатай.

Монгол Улсын газрын доройтлыг бууруулах, тогтвортой менежментэд суурилсан хамтын ажиллагааг эхлүүлэхээр хоёр тал бэлтгэл ажлаа эрчимжүүлэхээр тохиролцлоо.