"The ALS Association”-аас санаачилсан хүнд өвчтэй хүүхдүүдэд хандив өргөх зорилготой "Ice Bucket Challenge” буюу "Мөстэй усны сорил” барууны орнуудад хүчээ авч буй. Үүнд дэлхийн урлаг соёл, спортын алдартнууд хийгээд баячууд ч хамрагдаад байгаа билээ.
Тэгвэл Палестины сэтгүүлч Аяман Аль-Алаул "Шороотой чулууны сорил”-ыг эхлүүлсэн байна. Тэрбээр энэхүү үйлдлээрээ Израилиас Газын зурваст явуулж байгаа цэргийн ажиллагааны хор уршгаар палестинчуудыг маш их өвдөлт мэдэрч байгааг илэрхийлэхийг хүсчээ.
Аяман Аль-Алаул "Бидэнд "Мөстэй усны сорил”-д оролцох ус байхгүй. Харин энэ бөмбөгдөлтөд өртөж сүйдсэн барилгын шороо чулуу л байна. Энэ давалгааг цааш үргэлжлүүлж палестинчуудыг ямар өвдөлт мэдэрч байгааг өчүүхэн ойлгохыг хүсье” гэжээ.
Түүний санаалчилсан давалгаа нь "Facebook”, "Twitter” гэх мэт нийгмийн сүлжээний сайтуудад #RemainsBucketChallenge #rubblebucketchallenge #dustbucketchallenge гэх нэршлийг ашиглаж байгаа аж.
Дашрамд дуулгахад, "Мөстэй усны сорил” одоогийн байдлаар 66.2 сая ам.доллар цуглуулаад байна.
