“Монголын Цахим сэтгүүл зүйн анхдугаар форум” болно

Интернэтийн хөгжилд суурилсан фэйсбүүк, твиттер зэрэг сошиал медиаг дагалдан хүн бүр мэдээлэгч болж, дэлхийн өнцөг булан бүрт болж байгаа элдэв үйл явдлыг иргэд гар утсаараа дамжуулан бусдад түгээх боломж бодитой бүрдлээ.

Үүнийг дагалдан цахим орчин дахь хэвлэл мэдээллийн байгууллагын үйл ажиллагааны зорилго, үүрэг чиглэлийг өмнөхөөс арай өөр "өнгө төрхөөр” ойлгох шаардлага нийгмийн өмнө тулгарчээ. Тавдугаар сарын 3-ны өдөр тохиох "Дэлхийн хэвлэлийн эрх чөлөөний өдөр”-ийг угтан Монголын Сайтын Холбооноос томоохон арга хэмжээнүүдийг санаачлан зохион байгуулж байна.

Эдгээр арга хэмжээнүүдийн нэг бол тавдугаар сарын 01-ний өдөр 08:00-17:00 цагийн хооронд Төрийн ордны Их танхимд болох "Монголын Цахим сэтгүүл зүйн анхдугаар форум” юм. Тус форумын санаачлагчаар Монголын Сайтын Холбоо, ерөнхий зохион байгуулагчаар Монголын Сэтгүүлчдийн Нэгдсэн Эвлэл ажиллаж байна. Мөн Гадаад Харилцаа Хамтын Ажиллагааны Яам, Мэдээлэл Технологи, Шуудан, Харилцаа Холбооны газар, Харилцаа Холбооны Зохицуулах Хороо, ШӨХТГ, Оюуны өмчийн газар, Үндэсний Дата төв зэрэг төрийн байгууллагууд хамтран зохион байгуулахад оролцож байна. Үүний зэрэгцээ "Глоб Интернэшнл Төв”, "Монголын Хэвлэлийн Хүрээлэн”, "Монголын Хэвлэл Мэдээллийн Зөвлөл”, "Монголын Орчуулагчдын Эвлэл”, "Монголын Гэрэл Зурагчдын Нэгдсэн Холбоо”, "Монголын Телевизүүдийн Холбоо”, "Монголын Өдөр Тутмын Сонины Холбоо”, "Медиа Порт” кабелийн телевизүүдийн консерциум” болон салбарын бусад ТББ-уудын удирдлага, мэргэжилтнүүд Цахим сэтгүүл зүйн анхдугаар форумд оролцох юм.

Форумд оролцогч талууд Цахим сэтгүүл зүйн асуудлаар өөр хоорондоо байр сууриа илэрхийлэн, мэдлэг мэдээллээ солилцож, санал бодлоо хуваалцан, форумын төгсгөлд энэ салбарын асуудлуудын хүрээнд тодорхой ойлголцолд хүрч "Улаанбаатарын цахим тунхаг”-ыг батлан гаргахаар болжээ.

Цахим сэтгүүлзүйн тулгамдсан асуудлаар санал бодлоо илэрхийлэх хүсэлтэй хэн бүхэнд тус форумын үйл ажиллагаа нээлттэй бөгөөд оролцохыг хүссэн хүмүүс дөрөвдүгээр сарын 30-аас өмнө МОСАХ-ны ажлын албаны 315090, 88087155, 99222222 тоот утсанд хандаж овог, нэр, регистрийн дугаараа бүртгүүлэн, өөрийн биеэр очиж мандатаа хүлээн авч оролцох боломжтой юм.

Дашрамд дурьдахад МОСАХ-ноос форумд оролцогч бүрт гарын бэлэг, дурсгалын зүйлс гардуулах юм байна.