Какүрюү М.Ананд, Чиёшома Г.Мөнхсайхан нар түрүүлсэн Аки башё

Энэ сарын онцлох хүн озеки Тэрүнофүжи байсан ба тэрээр сүүлийн хэдэн барилдаандаа унаагүй бол түрүүлэх боломж байсан юм.  Тэрүнофүжигийн хувьд бяртай хүчтэй байгаа боловч тактик, техникээ улам сайжруулах хэрэгтэй нь түүний барилдаанаас харагдсан. Ялангуяа өрсөлдөгч бөхдөө барьц авах боломжгүйгээр хурдтай босох, түрүүлж барьц авах зэрэг техникийг Их аваргуудаас суралцах хэрэгтэй болов уу.

Манай бас нэг залуу хүчтэн Иичножёо энэ сард 9-6 үзүүлэлтэйгээр чансаа өгсөх нь тодорхой болов. Тэрбээр өөрийн том дутагдал болоод байгаа шилдэж татах зэрэг дутагдалаа Аки башёд гаргасангүй, барьц авах, урагш довтлох зэрэг өөрт тохирсон арга барилтай болж байгаа нь сайшаалтай.

Энэ сард Кёкүшюүхо Т.Эрдэнэбаатар, Сококурай Энхтүвшин нар 8-7 амжилттай барилдаанаа дуусгасан бол Тамаваши, Токитэнкү, Сэйро, Кагамио нар тавин хувийн амжилт үзүүлж чадсангүй. Сэйро доод зиндаа руугаа унах бол Асасекирюү Б.Дашням маэгаширагийн 16 үлдэх магадлалтай байна.

Жүрёо зиндаанд барилдсан гурван бөхөөс Такайнова А.Баасандорж 9-6 амжилтаар дээд зиндаанд эргэн ирэх нь тодорхой бол Шёотэнро Д.Нямсүрэн макүшита зиндаа руу буухаар болжээ. Араваши Э.Дөлгөөн 7-8 амжилт үзүүлсэн.

Макүшита зиндаанд найман бөх аваргын төлөө барилдсанаас манай бөх Б.Ганбаатар арслангийн хүү Чиёшома Мөнхсайхан нэмэлт барилдаанд ялалт байгуулж түрүүлсэн юм. Тэрбээр дараа сард Жүрёо зиндаанд дэвшиж магдагүй. Мөн Азүмарюү С.Тодбилэг 6-1 амжилт үзүүлж зиндаа өгсөхөөр боллоо. Тэрбээр дээд зиндаа хүртэл барилдаж байсан боловч гэмтлийн улмаас макүшита хүртэл чансаа уруудсан билээ.

Япон бөхчүүдээс озеки Кисеносато, Котошёогикү нар 11 давсан бол Гойёдо 7-8 амжилттай тэмцээнээ дуусгав. Ахмад бөх Ёшиказе энэ сард гайхалтай сайхан барилдаж Үндэсний баатрын хэмжээнд хүрсэн. Тэрбээр Аварга, озеки, сэкиваке, комосүби гээд олон том цолтонг ээлж дараалан өвдөг сөхрүүлсэн. Мөн маэгашира Икиой энэ сард маш сайн барилдсан билээ.