|

Зүүд байсан ч болоосой

Сингапур улсад сурдаг 21 настай Б.Хасар аравдугаар сарын 3-нд автомашины осолд орж, тархиндаа хүнд гэмтэл авчээ. Тэрээр одоо дөрөв дэх хагалгаандаа ороод буй бөгөөд эмчилгээний төлбөрийн үлдэгдэл нь 98 орчим сая төгрөг болоод байгаа аж. Цаашид хэд хэдэн шинжилгээ өгөхөөс гадна, эмчилгээний зардал эцсийн байдлаар хэдэн төгрөг болох нь тодорхойгүй байгаа аж.

Гэр бүл, найз нөхөд нь нийлж эмчилгээний зардлыг цуглуулж байгаа хэдий элэг нэгт ахан дүүсээсээ тусламж гуйхаас өөр аргагүйд хүрсэн байна.

Найз нөхдийнхөө дунд нэр хүндтэй, элэгсэг зантай залуу айлын ганц хүү. Сургалтынхаа төлбөрийг олохоор ажил гололгүй хийдэг, хичээлдээ ч сайн түүнд туслахаар найзууд нь нэгдэж, эмчилгээний зардлыг цуглуулахаар "Дусал сэтгэл” аяныг эхлүүлжээ.

Сайхан сэтгэлт Монголчуудын сэтгэлийн өглөг буянаар хөл дээрээ боссон олон хүн бий. Үүний нэгэн адилаар дусал сэтгэл нийлж 21 настай залууг хөл дээр нь босгох хүч бий гэдэгт найзууд нь итгэн хандивын аян, хэд хэдэн үйл ажиллагааг зохион байгуулж байгаа аж.

Тэд найзынхаа тухай бодит түүхийг бичсэн захидлаа бидэнд илгээж, олон хүнд хүргэхийг хүссэн юм. Ингээд Б.Хасарын тухай, түүнд тохиолдсон золгүй явдлын талаар найзуудынх нь бичсэн түүхийг бүрэн эхээр нь хүргэж байна.

Шөнө дунд Буянаагийн утас дуугарлаа. Нэгэн танихгүй залуу зүүд гэмээр хачин юм ярьж эхлэв.

Өглөөний шаргал нарны хурц гялбаа цонхоор нэвтрэн хуучин модон орны хөлөнд тусна. Өглөө болжээ. Сэрүүлэг нөгөө л янзаараа 06.30-д хангинан дуугарч өглөөний нам жимийг эвдэв.

Өчигдөр орой рестораны цагийн ажилдаа ядарсныг ч хэлэх үү нойрмоглосоор нуухаа арчин босохдоо Хасар орой Перанакан музей рүү хөтчөөр явах ажилтайгаа санан шүүгээгээ ухаж эхлэв.

Хуучин бор цүнхэндээ хөтчийн хувцсаа хийх зуур шүүгээний буланд хэвтэх улаан ороолт нүдэнд нь туслаа. Тэрхэн мөчид хайр шингэсэн харцаараа дулаахан инээмсэглэн намар зүүж яваарай гэж өгч байсан ээжийнх нь дүр  санаанд оров. Хэдий өчигдөр орой ярих гээд тохирсон ч ажлаас нь гэнэт дуудсан тул гэрээсээ хам хум гарч явснаа санаж, өнөөдөр ахиад л амжихгүй нь дээ гэж бодон харамсав. Гэвч өчигдөр нилээн хичээж бүх бие даалтуудаа дуусган, ресторандаа ажиллаад гайгүй цайны мөнгөтэй болсноо бодохоор сэтгэл нь сэргэж ахин нэг завгүй өдрийг эхлүүллээ.

Хичээлийн сүүлийн паар дээр явц дундын шалгалт авснаас өөрөөр бүх зүйл хэвийн өнгөрлөө. Харин сургуулиасаа гарах замдаа тохирсон ёсоор Профессор Клерагигийн өрөөгөөр дайрч түүний судалгаанд нь туслах цагийн хувиараа өөрчлөх тухай ярилцав. Учир нь Хасар өвлийн амралтаар гэртээ харихыг хамгаас илүү хүсч байв. Хөтчийн ажилдаа явахад хоёр цаг үлджээ. Энэ хооронд Монголоос хамт ирсэн найзтайгаа сургуулийн кампын дэргэдэх кофе шопд уулзан түрүү долоо хоногт зээлсэн 50 доллараа төлчихөөд орой тайлбарлах музейн тухай мэдээллээ ахин нэг сэргээн уншиж хэсэг суугаад  яг 5.00 цаг болоход жуулчидтайгаа уулзахаар зочид буудал руу нь яаравчлав.

.........

Оройн 10 цаг, гадаа хэдийнээ харанхуй болж гудамжинд хүмүүс татарч, цөөн явах нэг нь халамцуу эсвэл гэрлүүгээ яарсан харагдана. Хасар маань ч адил ажлаа дуусгасан тул ээжтэйгээ ярина гэхээс яаран алхалсаар нэг л мэдэхэд гэрийнхээ ойролцоо ирсэн байлаа.

.........

Гэнэт шуугин ирэх машины дуу хадаж, мөргөлдөх чимээ сонсогдов. Маш их өвдөлт... Цав цагаан гэрэл... Хамгийн сүүлд ээжтэйгээ ярихдаа өвлийн амралтаараа гэртээ очихоор болсноо хэлж амжаагүй нь санаанд оров... Ээж нь духан дээр нь үнсээд миний хүү цайгаа уугаарай гэх шиг болж сэрээд хартал гэртээ ирчихсэн, ээжийнх нь чанадаг банштай цайны сайхан үнэр хамар цоргиулав. Энэ үнэрийг, ээжийгээ ямар их санаа вэ гэж бодох зуур эргэн тойрны зүйлс аниргүй цагаанд замхарлаа....

....БИ ЭЭЖДЭЭ Л ОЧМООР БАЙНА...

Шөнө дунд Хасарын ээж Буянаагийн утас дуугарлаа. Нэгэн танихгүй залуу зүүд гэмээр хачин юм ярьж эхлэв. Буянаа чихэндээ ч итгэсэнгүй, түүний ганц хүүг машинд мөргүүлсэн, одоо эмнэлэгт хагалгаанд орж байна гэлээ... Зүүд байсан ч болоосой...

Уншигч та Б.Хасарт туслахыг хүсвэл дараах дансанд мөнгөн тусламж илгээх боломжтой.

  • Хаан банк: 5045314599 /MNT/, 5133034329 /USD/
  • Голомт банк: 2105015851 /MNT/
  • Данс эзэмшигчийн нэр: Б.Буяндэлгэр /Ээж/
  • Холбоо барих: 94090925, 99958280, 99955379

Мөн найзуудынх нь өрнүүлж буй "Дусал сэтгэл” аяны талаар дэлгэрэнгүй мэдээллийг ЭНД дарж аваарай.

 

485
  • [100 чухал сэдэв] - Тэнгэр үзэл Үзсэн   1242 2014-07-15
  • Г.АНХБАЯР – ХЭЛЭМГИЙ ЭР “АВЬЯАСЛАГ МОНГОЛЧУУД 2016” Үзсэн   995 2016-09-06
  • VIBE LOUNGE Maraljingoo- Miss U & Uur uuriin zvgt l Маралжингоо оролцов Үзсэн   498 2017-04-28
  • Уснаас болж хаалгандаа гоол алдсан бичлэг Үзсэн   851 2015-05-29
  • The Lemons - Husel Үзсэн   1467 2014-07-24
  • Хэн нэгний санаандгүй гаргасан алдаа хэн нэгний хамгийн үнэтэй зүйлийг авч одно /аймшигт ослууд/ Үзсэн   1410 2014-07-23
  • Нисдэг машин тун удахгүй... Үзсэн   435 2017-04-11
  • Ц.Нямдорж: Нойроо дийлээч АН-хан! Үзсэн   498 2015-10-16
  • АНХААРУУЛГА: Уншигчдын бичсэн сэтгэгдэлд www.WINDOW.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 7711-0505 утсаар хүлээн авна.
    Нэр:*
    И-мэйл:
    Сэтгэгдэл:
    Bold Italic Underline Strike | Align left Center Align right | Insert smilies Select color | Add Hidden Text Insert Quote Convert selected text from selection to Cyrillic (Russian) alphabet Insert spoiler