Эхнэрээ хэрхэн зодох талаар видео хичээл заажээ

Саудын Арабын гэр бүлийн сэтгэлзүйч Халед аль-Сакаби "Аллахын хүсэл зоригоор” эхнэрээ хэрхэн зөв зүйтэй зодох тухай видео хичээл нийтлүүлсэн байна. Энэхүү өвөрмөц бичлэг хоёр хоногийн дотор 200 гаруй мянган хүнд толилуулагдан, олон орны итгэгчдийн дунд маргаан дэгдээж амжлаа хэмээн Independent-д мэдээлжээ.

Халед аль-Сакаби үгийнхээ эхэнд, эхнэрээ зодно гэдэг нь "түвэгтэй бөгөөд хэцүүхэн асуудал” гэдгийг онцлон тэмдэглэсэн байна. Өөрийн хайртай бүсгүйдээ бие бялдрын шийтгэл оногдуулна гэдэг нь түүнийг "биеэ зөв авч явахад” нь тус нэмэртэй гэжээ. Сэтгэлзүйчийн үзэж буйгаар, исламын шашны дэг жаягийн дагуу ямар ч уур уцаар хүрээгүй байсан ч цохиж зодох нь зайлшгүй чухал гэнэ.

Харин эхнэрээ саваа мод юм уу, хурц ирмэгтэй зүйлээр цохиж болохгүй, модон иштэй сойз, даавуун оосор зэргээр цохих нь илүү тохиромжтойг сэтгэлзүйч анхааруулсан байна. Мөн эхнэрээ шийтгэхийн өмнө түүнд "Аллахын хүсэл зоригийн дагуу ямар үүрэг хариуцлага хүлээдэг тухай нь сануулах” хэрэгтэй гэдгийг зөвлөжээ.

Өнөөгийн байдлаар, олон эмэгтэйчүүд өөрсдийгөө эрчүүдтэй адил тэгш эрхтэй гэж бодох болсон нь томоохон асуудал үүсгээд байна гэж Аль-Сакаби онцлон дурдсан аж.