Хоосон хашаагаа хаус мэт тохижуулсан тэргүүний өрхөөр зочиллоо

-Хотын захын хороололд хаустай мэт амьдардаг Л.Шаравдорж гуайнх-

Жил бүр нийслэлийн тэргүүний өрхийг шалгаруулж, урамшуулдаг уламжлалтай. Энэ жил нийслэлийн тэргүүний өрхөөр 9 дүүргээс тус бүр нэг өрх шалгарсан билээ.

Тэгвэл үлгэр жишээ эдгээр өрхийн нэг болох иргэн Л.Шаравдоржийнд "Eagle” телевизийн сурвалжлах баг зочиллоо.

Л.Шаравдорж гуайнх өдгөө нийслэлийн захын хороолол гэгддэг Сонгинохайрхан дүүргийн Толгойтод өнгө нэмэн амьдарч байна. Есөн ам бүлтэй энэ өрхийн тохижилт хотын төвийн мансардтай хаус бүхий өрхүүдээс ялгарах зүйлгүй ажээ.

Л.Шаравдорж гуай хүүхдүүдийнхээ хамт мод, төмрөөр хийж болох бүх зүйлийг хийж, ийнхүү орчноо тохижуулсан гэнэ. Өөдлөх айл үүднээсээ гэдэг шиг Л.Шаравдорж гуайн гэр гадна хашаанаасаа эхлээд өнгөлөг. Тоосгоор хашаагаа барьж, гол хаалгаа төмрөөр хийжээ. Ингэхдээ зүгээр ч нэг хэдэн төмөр угсарч, хаа яайш хатгаагүй байв. Хэв хийц гаргаж, урласан нь улам л өнгө нэмсэн гэлтэй.

Агаар цэвэршүүлж, тоос шүүх онцгой ач холбогдолтой хэмээгээд Л.Шараваа гуай мод тарьж, тордох ихэд дуртай аж. Тэрээр хашаан дотроо тарьсан модоо услах зорилгоор тусгай усан санг ч байгуулжээ.

Мөн үхрийн нүд, чацаргана зэрэг жимсний мод тарьж, өрхийн хэрэгцээгээ өрөөлөөс ч худалдахааргүй хэмжээнд хангаж чаддаг байна. Тэр ч бүү хэл гадна орчноос эхлээд байшингийнхаа дотор талыг ч эвлэгхэн тохижуулсан байв.

Тэрчлэн байшингийн гадна сууриа чулуугаар тойруулан бүржээ. Л.Шаравдорж гуай энэ бүхнийг хүүхдүүдтэйгээ хамтарч бүтээсэн бөгөөд тийм ч их мөнгө зарцуулаагүй гэнэ.

Энэ тухай тэрээр ярихдаа сэтгэл байвал бага мөнгөөр их зүйл хийж болдог гэх. Хүн ер нь залхуурдаггүй л байх хэрэгтэй. Дандаа бэлэнчилж, бусдын гар харах хэрэггүй. Хүн сэтгэж л чадвал амьдрал жигдрээд явчихдаг юм хэмээн ярих нь түүнийг ямархан хөдөлмөрч хүн болохыг илтгэх мэт.

Энэ л үзлээр тэр үр хүүхдээ хүмүүжүүлсэн байна. Бүтээлч сэтгэлгээгээр хөдөлмөрлөж, бүхнийг өөрийн гараар бүтээж ирсэн нь ийнхүү Л.Шаравдорж гуайнхыг хотын үлгэр жишээ өрхийн нэгд багтахад нөлөөсөн байна.

-Анх хашаа ч үгүй хоосон газарт таван ханатай гэрээ барин амьдарч эхэлжээ-

Харин Л.Шаравдорж гуайн гэргий ийн ярьж байна.

"Бид гуравдугаар хороондоо амьдраад 40 жил болж байна. Ханьтайгаа гэрлээд 30 гаруй жил болж байна. Анх биднийг ирэхэд эргэн тойронд айл их цөөхөн байлаа. Хашаа ч үгүй, хоосон газарт л гэрээ бариад бууж байлаа шүү дээ. Тухайн үед цас их орохоор хэцүү байлаа. Нэг удаа цагаан сарын өглөө сэрээд галаа түлэхийн өмнө гараад хартал хаалгыг маань цас дарчихсан, бүр онгойдоггүй шүү. Бараг л хаалгатай тэнцүү шахам цас хунгарласан байв. Одоо бол хотын төв болох нь ээ. Айлууд ч их буусан байна” хэмээн хуучиллаа.