Хөл бөмбөгийн багийнхнаас гурав нь ослоос амьд гарчээ
Avro RJ85 онгоц Боливийн Санта Круз хотоос Колумбийн Меделлин хот руу нисч явсан ба Колумбийн Рионегро хотын ойролцоо осолдсон хэмээн иргэний агаарын тээврийн албанаас мэдэгдсэн юм.
Chapecoense багийн гурван тамирчин, нислэгийн багийн хоёр гишүүн болон нэг сэтгүүлч ослоос амьд гарсан байна. Онгоц Виру Виру олон улсын нисэх буудлаас 18:18 цагт хөөрчээ. 22 цагийн үед нисгэгчид цахилгааны саатал гарч, онцгой байдал үүссэн талаар дамжуулсан байна. Цаг агаарын байдлын улмаас онгоц сүйрсэн газар руу зөвхөн газраар л очих боломжтой байгаа гэнэ.
Ослын өмнөх зураг
Бразилийн Chapecoense баг энэ лхагва гарагт Колумбийн Atletico Nacional багтай Өмнөд Америкийн Цомын тэмцээний хэсгийн тоглолт хийх байсан юм. Бразилийн Сери А лигийн 9 дэх баг болох Chapecoense энэ жил тоглолтоороо олныг гайхшруулаад байсан юм. "Энэ бол Үнсгэлжингийн түүх. Тэд Бразилийн шилдэг багуудын тоонд сүүлийн хэдэн жилд бичигдэж эхэлсэн бөгөөд Өмнөд Америкийн Цомын тэмцээний шигшээд шалгараад байсан юм. Сүүлийн жилүүдэд тэд гайхалтай амжилт гаргасан” хэмээн World Soccer сэтгүүл онцолсон юм.
Тэд финалд шалгараад маш их баярлаж байжээ
Chapecoense багийг 1973 онд байгуулсан,сүүлийн жилүүдэд зэрэглэл нь тасралтгүй өссөөр байжээ. Өмнөд Америкийн Хөл Бөмбөгийн Холбоо, "Цөөхөн хэд нь л энэ мартагдсан багийн нэрийг мэддэг байсан бол одоо бүх тив даяараа мэддэг боллоо” Хэмээн Chapecoense багийн талаар хэлж байжээ. Хамгийн сүүлд Бразилийн баг Өмнөд Америкийн Цомын тэмцээнд түрүүлж байсан нь 2008 онд байсан ба Chapecoense баг түүнээс хойш энэ цомын эзэн болох анхны Бразилийн баг болох магадлалтай байжээ.
Өмнөд Америкийн Хөл Бөмбөгийн холбоо тус холбооноос зохион байгуулж байсан бүх үйл ажиллагаа болон тоглолтуудыг түр зогсоосон байна. Мөн холбооны ерөнхийлөгч Алехандро Домингез Меделлин хотыг зорьжээ.
Бразилийн Ерөнхийлөгч улс даяар гурван өдрийн эмгэнэл зарлаад байна.
