Т.Дэлгэрмөрөнгийн мэгштэлээ уйлж буй дүр зураг олны сэтгэлийг өвтгөв
Монголын рок попын ертөнцийн тулгуур багана гэгдэх МУГЖ Б.Дашдондог 50 насныхаа төрсөн өдрийг урлаг соёлын эрхмүүд болох найз нөхөд, гэр бүлийнхэнтэйгээ нижгэр тэмдэглэн өнгөрүүлжээ. Тэрээр зүгээр ч нэг дуулж хуурдаад, наргиж цэнгээд өнгөрөөе гэж бодоогүй бололтой. Амьдрал хэмээх их далайд 30 жил хамтдаа аяласан хайртай ханьдаа зориулж гэнэтийн бэлэг барьж, дахин сүйн бөгжөө солилцсон гайхалтай үдэш болж өнгөрсөн юм. Өөрийнхөө зохиосон өвөрмөц шүлгийг уншиж өгч инээд хөөр аз жаргал бэлэглэж тэнд цугласан бүх хүмүүсийн сэтгэлийг огшоож байсан төдийгүй гэргий Нараа нь нулимсаа барьж дийлэхгүй байсан юм. Тэр дунд МУСТА Дэлгэрмөрөн ихэд баясгалантай зогсож байсан ч үүрд хамт байгаарай хайрт минь гэж хэлэх мөчид өөрийн эрхгүй мэгштэл уйлж, хүмүүсийг орхин холдож байгаа дүр зураг олон хүний сэтгэлийг үймрүүлэв бололтой. Хайрт ханийгаа бурханд алдаж Зөөлөнсий охинтойгоо өнчирч үлдсэн ч өдийг хүртэл эр хүний сэтгэлийн хат зааж амьдралын хатуу бүхнийг сөрж яваа нэгэн. "Өнөөдөр чи инээж, нөгөөдөх нь уйлдаг ч өөр нэгэн өдөр чи гуниж, цаадах нь дуулна” хэмээх үгний утга энд биелэж хорвоогийн олон өнгө хослуулсан энэ өдөр олон хүний зүрх сэтгэлд ийнхүү бичигдэн үлджээ.
Эх сурвалж:Шуурхай.мн
