Леброн жилд 1,5 сая долларыг бие хаандаа зориулдаг

Леброн Жэймсийн үндсэн дасгалжуулагч бол Майк Манчиас. 2001 онд Манчиас биеийн хүчний дасгалжуулагчаар суралцаж байхдаа амьдралынхаа алтан боломжийг олж авсан юм. Тэрбээр Тим Гроверын дэргэд дадлагажигчаар ажиллаж, домогт Майкл Жорданы нөхөн сэргээлт дээр ажиллах завшаантай учирчээ. Ингээд 2004 онд "Кливлэнд Кавальерс” багт томилогдож ирснээр Лебронтой танилцсан түүхтэй. Жэймс түүнийг хувийн дасгалжуулагчаа болгожээ. Манчиас Леброныг хаа явсан газар нь дагалдаж явдаг. 

Жэймс Бээжингийн олимпийн наадмын дараа Кобе Брайант бэлтгэлээ хэрхэн шаргуу хийж буйг хараад биедээ улам ихээр анхаарах болжээ. Тэр цагаас хойш Леброн өдөр бүр биедээ анхаарах болсон гэнэ. Байнгын дасгал сургуулилт, биеэ амраах зэрэг нь ихээхэн цаг хугацаа, зардал шаардах нь мэдээж. Жэймс долоо хоногийн бүх өдөр биеийн тамирын танхимд очдог бөгөөд йогоор хичээллэж, элдэв тоног төхөөрөмж дээр ажилладаг. Биеийн хүчний дасгалуудыг ч хийдэг. Ингэж байж л "Хаан” Жэймс байр сууриа хадгалдаг байна. 

Түүнд хувийн тогооч, илээч, бариач төдийгүй нойрсуулагч эмч хүртэл байдаг гэнэ. Биедээ анхаарч Леброн жилдээ 1,5 сая долларыг зарцуулдаг. Өнгөрсөн жил Жэймс дэлхийн хамгийн сайн бэлтгэлтэй хүмүүсийн жагсаалтад дэд байрыг эзэлсэн юм. Тэргүүн байрыг Криштиану Роналду эзэлсэн билээ.