“Харанга”-ын Ц.Чулуунбатын гэргийдээ зориулсан “Үгүйлэн санана”

Т.САЙХАН

Ерөнхийлөгч Х.Баттулга Үндэсний эрх чөлөөний өдрийг тохиолдуулан "Харанга” хамтлагийн таван дуунд Төрийн соёрхол хүртээсэн. Түүний нэг нь "Үгүйлэн санана ” хэмээх бүтээл байлаа. Тус бүтээлийг 1990-ээд оны эхээр "Харанга” хамтлаг дуулж, тэр үеийн залуусын зүрх сэтгэлийг байлдан дагуулж байсан.

20 гаруй жил өнгөрсөн эдүгээ цаг үед ч энэ дуу хит хэвээрээ байгаа билээ. "Харанга” хамтлагийн дуулж, олонд хүргэсэн "Үгүйлэн санана” дууны шүлгийг Соёлын гавьяат зүтгэлтэн сэтгүүлч, яруу найрагч С.Оюун бичиж, туурвисан юм. Тэрээр хэвлэлд өгсөн ярилцлагадаа "Үгүйлэн санана даа” шүлгийг үнэхээр олон жилийн өмнө бичжээ. Дуу гэдэг гурван жигүүртэй байдгийг Лхагваа маань ард түмэндээ мэдрүүлсэн дээ” гэж ярьсан байдаг.

Харин аяыг Урлагийн гавьяат зүтгэлтэн Ц.Чулуунбат зохиосон. Тэрээр Би 1985 оны аравдугаар сарын 15-нд дууны үггүйгээр хөгжмөө бичсэн. Соёлын гавьяат зүтгэлтэн, яруу найрагч С.Оюун эгчийн номноос шүлгийг нь уншаад, 1993 онд эхнэртээ зориулж энэ дууг зохиосон юм. Тухайн үед шүлэг маш их таалагдсан. Тэр үед "Харанга” хамтлаг "My rock” тоглолтоо хийж, энэ дууг дуулж билээ” гэжээ.

Үгүйлэн санана

Санана даа чи намайг санана

Сар нарыг унтуулан сэрээж санана

Нартайд чи намайг санаж гандана

Сартайд чи намайг санаж бүдэрнэ

Нартайд чи намайг санаж гандана

Сартайд чи намайг санаж бүдэрнэ

Үгүйлнэ дээ чи намайг үгүйлнэ

Үдэш унтавч зүүдэндээ үгүйлнэ

Өглөө босоод харцандаа үгүйлнэ

Өр зүрх чинь намайг үгүйлнэ

Өглөө босоод харцандаа үгүйлнэ

Өр зүрх чинь намайг үгүйлнэ

Би хаа ч явсан үргэлж чамтай

Сэтгэл зүрхэнд чи дандаа хамтдаа

чи хаа ч явсан үргэлж надтай

Хоёр сэтгэл тэмүүлэн бие биенээ хайна

Хүснэ дээ чи намайг хүснэ

Хүнийг хэлэлтгүй би өөрөө хүснэ

Хол газар хилийн дээсэн дээгүүр

Хоёр сэтгэл үгүйлэн бие биенээ хайна