Германы жүдоч дасгалжуулагчдаа алгадуулснаа тайлбарлав

Германы жүдоч Мартина Трайдос олон нийтийн сүлжээнд олны дургүйцлийг төрүүлээд байгаа дүрс бичлэгт тайлбар хийжээ. Дүрс бичлэгт түүний дасгалжуулагч Клаудио Босса татамид гарахаас нь өмнө сэгсэрч, алгадаж байгаа нь харагддаг.

Мягмар гарагт Трайдос дүрс бичлэгийг олон нийтийн сүлжээнд нийтлэхдээ "Хангалттай хүчтэй байсангүй” гэсэн тайлбартай бичсэн байна. Германы жүдоч 63 кг жинд Унгарын тамирчин Софи Озбаштай барилдаж, ялагдсан юм.

Дасгалжуулагчийнхаа энэхүү үйлдлийг тайлбарлахдаа тэрбээр "Залуус аа, санаа бүү зовоорой. Энэ бол тулааны өмнө миний сонгодог зан үйл юм. Намайг халаахын тулд миний дасгалжуулагч хүссэнийг минь хийдэг юм. Тиймээс түүнийг битгий буруутгаарай. Ийм зүйл тулааны өмнө сэргэхэд надад хэрэгтэй байдаг юм” гэж тайлбарлажээ.

Лхагва гарагт энэхүү дүрс бичлэгтэй холбогдуулан Олон улсын жүдо бөхийн холбоо албан ёсны анхааруулга гаргасан байна.

"Жүдо бөх нь сурган хүмүүжүүлэх спорт бөгөөд жүдо бөхийн ёс зүйн дүрэмд харшилсан ийм үйлдлийг үл тэвчинэ” гэж тус холбооны мэдэгдэлд онцолсон байна.