"Таны дүүг үү, мэдэхгүй"
"Хааны шинэ хувцас" хэмээх алдарт ёгт үлгэр бий. Түүн дээр хоёр зальхай
этгээд "Хорвоо дэлхийд байхгүй хосгүй чамин хувцас хийж өгнө" хэмээн
хааныг мэхлээд болзсон өдөр болоход "Ухаантай хүнд харагддаг, тэнэг хүнд
үзэгддэггүй хувцас өөрт нь өмсүүллээ" гэж хэлдэг.
Мэдээж хаан тэнэг болохгүйн тулд юу ч харахгүй байгаагаа хэлэлгүй "шинэ
хувцас"-тайгаа ард олныхоо дунд гарна. Хаандаа тал алдахыг хүсээгүй
түшмэдүүд, ард иргэд нь түүний хувцсыг сайхан болсныг шагшин магтана.
Гэтэл нэг хүү олны дундаас "Хараач, хаан нүцгэн явна" гэж хэлэх нь тэр.
Түүнтэй төстэй цочроог нэгэн цэцэрлэгийн хүү нийтэд өгч орхилоо.
Тодруулбал, телевизийн сурвалжлагч: -Миний дүүг хэн гэдэг вэ?
Хүү: -Таныг дүүг үү. Мэдэхгүй. Ийм харилцан ярианы бичлэг интернэтэд
шуугиан тарьж байна. Цэцэрлэгийн насны хүү, сурвалжлагч гэхээр нэг нь юу
ч мэдэхгүй гэнэн амьтан нөгөө нь хэл ярианы мэргэжилтэн хоёрын
харьцуулалт болж харагдаж байгаа. Гэтэл хүү түүнийг мад тавьчихжээ.
Хүмүүс хүүг өхөөрдсөн сэтгэгдэл олныг бичиж байна. Гэвч нөгөө талаас
тэр хүүгийн хариулт "Хаан нүцгэн байна" гэж хэлсэн ёгт үлгэрт гардаг
хүүгийн алдарт үгтэй адил сонсогдоно.
Өнөөдөр зарлал, реклам байтугай албан захирамж, хэвлэлийн мэдээн дунд
утгыг нь буруу ойлгочих юм бишгүй гардаг болчихож. Энэ болгоныг "Цаг
үеийн зүйл", "Буруу ярьж, зөв ойлголцоно" гэх мэт биеэ өмөөрсөн үгсээр
хамгаалдаг.
Тиймээс ч хэлний эвдрэлийн талаар хэл ам таталдаг насанд хүрсэн хүн
одоо бараг байхгүй болсон байх аа. Харин хүү асуултыг зев ойлгож зохих
хариултыг нь өгсөн байна. Хүн бүр цагаан цаас шиг төрдөг.
Түүн дээр орчин нь юу дуртайгаа эрээчдэг гэлцдэг. Хаана хаанаа хэл
яриандаа анхаараад засаад явбал боломж бийг энэ явдал харууллаа. Үгүй
бол тэр хүү хожим "буруу ярьж зөв, ойлгодог" л болчихно.
Ж.Энх
Эх сурвалж: Нийслэл таймс
