С.Нарантунгалаг: Хайртынхаа нүдрүү хараад дуулах ямар сайхан гээч
Ч.ГАНТУЛГА
"Чамдаа би хайртай шүү” дуугаар нь залуу дуучин С.Нарантунгалагийг сонсогчид андахгүй. Тэрээр ханьтайгаа хамтарч "Хайртай” уран бүтээлийн тоглолтоо энэ сарын 21-нд хийх гэж барина. Дуучидтай ярилцсанаа хүргэе.
-Ханьтайгаа хамтарч анхны тоглолтоо хийх гэж байна. Бэлтгэл хэр байна?
-Тоглолт болоход хоёр хоног үлдлээ. Догдолж байна. Ерөнхийдөө бэлтгэл дуусчихсан. Одоо хувийн бэлтгэлээ хангаад дуулах л үлдэж.
-Тоглолтын нэр "Хайртай”. Ямар хайрыг мэдрүүлэхийг хүссэн бэ?
-Хайр гэдгийг өргөн утгаар нь ойлгуулахыг хүслээ. Ханийн хайр, нутгаа хайрлах сэтгэл, найзын хайр, гэр бүлийн гээд л. Тиймээс бидний тоглолтыг үзэх хүсэлтэй хүмүүс хайртай, дотныхоо хүнийг дагуулаад ирээрэй. Тэр өдөр та бүхний хайрын үдэш байх болно гэж хэлье.
-Та анх дуучин Д.Амарбаясгалантай дуулдаг байсан. Та хоёрын дуулсан дуу бүхэн хит болж чаддаг байсан шүү?
-Дөнгөж уран бүтээлээ эхэлж байсан үе л дээ. Д.Амарбаясгалан ахтайгаа олон хайрын дууг амилуулсандаа баярладаг. Харин энэ удаад өөрийнхөө хайртай хүнтэй, "Хайртай” гэсэн тоглолт хийх гэж байгаадаа баяртай байна. Бид тайз засалтаа хүртэл хуримын ордон, хайрын өргөө шиг байхаар зассан. Тоглолтдоо "Улаан сарнай” хамтлаг болон залуу дуучин Б.Түвшинсайхан, н.Ууганбаяр нарыг урилаа.
-Дуучин Д.Амарбаясгалан оролцохгүй юм уу?
-Амараа ах маань Австрид гэр бүлээрээ амьдарч байгаа. Тиймээс энэ удаагийн тоглолтод хараахан ирж амжихгүй. Бид хамтын уран бүтээлээ завсарласан нь ийм учиртай юм. Гэхдээ миний хувьд буцаад тайзнаа гарахдаа ханьтайгаа хамтарч дуулж байгаадаа сэтгэл хангалуун байна. Бидний дуу үргэлж гэгээн хайрыг бэлгэдэг. Тэр үед хайртынхаа нүдрүү хараад дуулах ямар сайхан гээч.
-Ханьтайгаа хэрхэн танилцаж байв?
-Бид найман жилийн өмнөөс бие биенээ танина. Эхлээд найзууд байсан юм. Цаг хугацаа өнгөрөх тусам бие биедээ татагдаж, хайртай болсон. Цаг хугацаа бүхний шалгуур гэдэг нь үнэн юм билээ. Бид хөөрхөн хүүтэй. Одоо гурван нас хүрч байна.
-Урлагийн гэр бүл байна гэдэг нэг бодлын сайхан ч ард нь амьдрал, үр хүүхэд орхигдох тал бий гэдэг. Энэ асуудлыг яаж зохицуулж байна?
-Хэдийгээр цаг үргэлж ханьтайгаа хамт байж, уран бүтээлээ ярилцдаг ч хоёулаа завгүй явахаар үнэхээр хүүхэд орхигддог юм билээ. Биднийг өсгөчихөөд, ээж аав минь одоо хүүг минь өсгөж байна. Хариу нэхдэггүй буянтан болсон буурлууддаа л баярлаж явна.
-Дуучин аав, ээжийн хүү мэдээж дуулах мэдрэмжтэй л биз дээ?
-Дууг дагаж дуулна, бүжиглэнэ шүү дээ. Тэгэхээр мэдрэмжтэй юм шиг байгаа юм. Би хүүгээ гэдсэнд байхад нь бие даасан нэлээд хэдэн уран бүтээл хийсэн юм. Ээжтэйгээ хамт студид бичлэгт орж байлаа.
-Дуучин болох таны багын мөрөөдөл байв уу?
-Багаасаа л дуулдаг охин байсан. Гэхдээ дуучин болоход ээжийн минь нөлөө их байсан гэж боддог юм. Учир нь миний ээж их сайхан дуулдаг байлаа. Өөрөө уран бүтээлч болж чадаагүй учир охиноо заавал дуучин болгоно гэж ярьдаг байсан юм. Би ээжийнхээ үргэлжлэл болж, биелүүлж чадаагүй мөрөөдлийг нь гүйцээж яваадаа баярладаг. Ээж минь одоо тэнгэрээс хараад баярлаж суугаа нь лавтай.
-Таны анхны уран бүтээл "Чамдаа би хайртай шүү” дуу одоо ч хит хэвээрээ байна. Дөнгөж уран бүтээл хийж эхэлсэн үе гэхэд азтай байсан юм шиг санагдах юм?
-Уран бүтээлчид анх сонсогчдод танигдахын тулд олон уран бүтээл хийдэг. Харин миний хувьд анхны дуу минь л хит болж чадсан учир таны хэлснээр өөрийгөө азтай гэж боддог шүү. Тиймээс энэ дуугаа хайртай, дотны хүмүүстэйгээ адилхан хайрлаж, хүндэлдэг. Үг, аяыг нь хөгжмийн зохиолч Б.Баасанхүү ах маань зохиосон юм. Одоо ч энэ хүний олон сайхан хайрын дууг ханьтайгаа дуулж байна.
Ц.Мөнхэрдэнэ:
УРЛАГИЙН ХҮНИЙ АМЬДРАЛЫГ ГЭРГИЙГЭЭСЭЭ Л СУРЧ БАЙНА
-Таны хувьд ханьтайгаа хийж буй анхны тоглолт. Догдолж байна уу?
-Тоглолт ойртох тусам сэтгэл хөдөлж, догдолж байна. Тоглолт гэдэг ямар их бэлтгэл, хөдөлмөр шаарддагийг ойлголоо. Тайзны хөшиг хаагдах үед л нэг амсхийх байх даа. Түүнээс одоо бол шөнө унтахдаа хүртэл зүүдэндээ тоглолтоо төсөөлж байна.
-Таныг барилгын мэргэжилтэй гэж сонссон. Хань чинь урлагт уруу татчихав уу?
-Тэр ч үнэн шүү. Намайг үргэлж дуулаач гэдэг байсан. Ханьтайгаа дуулаад гурван жил болж байна. Өмнө нь барилгын зураг төслийн чиглэлээр сурдаг байсан юм. Зөвхөн амралтаараа л Монголд ирдэг байлаа. Тоглолтоо хийж, шинэ цомгоо гаргачихаад мэргэжлээрээ ажиллах бодол байна. Гэхдээ энэ нь бидний хамтын уран бүтээл тасарна гэсэн үг биш шүү.
-Урлагийн хүний амьдралд хэр дасч байна?
-Зарим хүмүүс дуучин гэхээр их амархан мэргэжил гэж ойлгодог. Гэвч түүний ард ямар хүч хөдөлмөр, тэвчээр, сэтгэл шаарддагийн магадгүй уран бүтээлчид өөрсдөө л ойлгох байх. Нэг дуу хийхэд хоолой бичүүлнэ, дүрсжүүлнэ, өнөөхөө телевиз, радиогоор барьж гүйнэ, санхүүгээс эхлээд бэрхшээл их тулгардаг юм байна. Энэ бүхнийг хэрхэн зохицуулах, мөн урлагийн хүний амьдралыг гэргийгээсээ л сурч байна даа.
-Дуучин С.Нарантунгалагийг сонсогчид уран бүтээлч гэдгээр нь л мэддэг. Харин хувь хүн, зан чанарынх нь тухайд сайн мэдэхгүй юм?
-Их зөөлөн сэтгэлтэй хүн шүү. Сэтгэл хөдлөгөсөн клип, дуу сонсохоороо уйлчихдаг юм. Магадгүй урлагийн хүн учраас сэтгэл хөдлөл ихтэй байх. Бас хөдөлмөрч, дайчин эмэгтэй. Хүү бид хоёрыг муухай хувцастай явуулж үзээгүй.
-Түрүүн С.Нарантунгалаг эгч ээж болох мөчид төрсөн сэтгэгдлээ ярьсан. Харин таниас тэр үеийн тухай асуумаар санагдлаа?
-Амьдралын хамгийн сайхан, үгээр хэлэхийн аргагүй мөч тэр байдаг юм билээ. Анх хүүгийнхээ уйлах дууг сонсоод өөрийн эрхгүй огшсон. Итгэмээргүй ч юм шиг. Эхний нэг сар "аавын хүү” гэж хэлэхэд бас л эвгүй шүү.
-Гэр бүлийн үнэ цэнэ гэдгийг та юу гэж ойлгодог вэ?
-Гэр бүлийн амьдралд хамгийн чухал нь итгэл юм болов уу. Мөн нэг нэгэндээ буулт хийж чаддаг ухамсартай байх хэрэгтэй. Бид хоёрын хувьд бие биенээ сайн ойлгож, сонсч чаддаг. Одоо ч харцаараа нэгнээ ойлгодог болчихож дээ.
-Та хоёрын дууг сонсоод энэ 100 хувь зохиолын дуу гээд хэлчихэж чаддаггүй юм. Ямар учиртай юм бэ?
-Бидний дуулдаг урсгал яг зохиолынх гэхэд биш. Мөн үсчсэн эстрад ч биш. Ер нь Орос жанарыг баримталдаг юм. Ямар ч насныхан сонсох боломжтой гэсэн үг. Мөн уран бүтээлчийнхээ хувьд хөрвөх чадвар сайтай байхыг эрхэмлэж байна. Бидэнд поп стилэр дуулсан дуу ч байгаа.
Эх сурвалж: www.polit.mn
