Монгол орны гайхалтай бичлэг хийсэн залуугаас захидал ирлээ
Өчигдөр бид та бүхэнд Kaz Kang гэх Vimeo хэрэглэгчийн бүтээсэн гайхалтай бичлэгийг танилцуулсан билээ. Тэгвэл түүнд бичсэн захидлын хариу иржээ.
Rosetta гэх олон улсын дижитал сурталчилгааны компанид Ахлах уран бүтээлчийн алба хашдаг Петр Канг бичлэгийг хийсэн аж. АНУ-ын Калифорни мужид амьдардаг тэрээр Монгол эхнэртэй юм байна.
Дөнгөж өнгөрсөн долоо хоногт Монголоос буцаж, эх орондоо харьсан бөгөөд эхнэр нь энд үлджээ.
Түүний захидлын хэсгээс сонирхуулахад "Уран бүтээлч хүний хувьд надад гэрэл зураг авч, дүрс бичлэг хийнэ гэдэг хялбар зүйл. Тийм ч учраас бидний эргэн тойронд байгаа гоо үзэсгэлэнгээс онгодоо хөглөдөг. Монголын үзэсгэлэнт байгаль, ард түмнийг үгээр тодорхойлох аргагүй юм. Эртний тэр л төрхөө хадгалсан Монгол улс яах аргагүй дэлхий дээрх хамгийн онцгой газруудын нэг. Үүний улмаас би тэр бичлэгийг хийж, өөрийн үзсэн харсан гайхамшгийг бусадтай хуваалцахыг хүссэн юм. Сүүлийн жилүүдэд би дрон онгоц илүүтэй ашиглаж, агаараас бичлэг хийдэг болсон. Энэ технологийн хөгжлийн ачаар ганцхан хүн л тэр сайхан дүрслэлийг хялбархан авдаг болжээ” гэсэн юм.
Монголоор дуулж, монгол хэл бие даан сурсан Трилл Ноел-г бид сайн мэднэ. Түүнтэй нэгэн адил энэ залуу ч гэсэн бидний хүндэтгэлийг хүлээнэ гэдэгт итгэлтэй байна. Сайхан бичлэг хийсэнд тань баярлалаа, Петр Канг.
- Петр Кангийн хийсэн гайхалтай бичлэг -
