Тяньжин хотод цианид натри, нитрат калийн хорт бодис алдагджээ
Хятадын тэнгисийн боомт хот Тяньжинд болсон хүчтэй дэлбэрэлтийн хор уршигт дэлхий дахин анхаарал хандуулж байна. Одоогийн байдлаар 55 хүн амь үрэгдэж, 700 хүн хүнд хөнгөн гэмтэж, шархдан, дэлбэрэлтийн голомтын эргэн тойрон хоёр километр орчим газар орон сууцны барилгууд эвдэрч, 1,5 мянган автомашин шатсан бол хотын хэмжээнд ойролцоогоор 700 тонн цианид натри болон нитрат калийн хорт бодис алдагдаад байна. Хятадын засгийн газар сүйрлийн голомтод Ардын чөлөөлөх армийн химийн анги нэгтгэлийн албан хаагчдыг илгээж, сүйрлийн уршгийг арилгах бүх талын арга хэмжээ авч байгаа аж.
Тяньжин хотын Бинхай логистик төвд үйл ажиллагаа явуулж ирсэн "Жуйхай" компанийн агуулахад дэлбэрэлт болсон бөгөөд сүйрлийн дараа мөрдлөг шалгалт явуулахад тус компани химийн олон төрлийн хорт бодис агуулж байсны дээр агуулахаа тэсрэх бодис хадгалахад зориулан засаж өөрчилсөн байжээ.
Энэхүү дэлбэрэлтийн улмаас хотын хэмжээнд цианидын хор цацагдаж тарсан байна. Хотын ус зайлуулах сувагт гэхэд цианидын хэмжээ найм дахин их байсан учир онц байдал тогтооход хүрсэн аж.
Харин хүчтэй дэлбэрэлтийн үеэр цочирдон сандарсан хүмүүс хэрхэн үймэн гүйж буй нүд хальтрам бичлэг Хятадын нийгмийн харилцааны сүлжээнд тавигдсаныг дэлхий нийтийн олон сая хүн үзжээ.
