Дүрвэгчийг унагаасан зураглаачийг халжээ

Унгарын дүрвэгсдийн хуарангаас өчигдөр 17.00 цагийн орчимд олон мянган дүрвэгч зугтахыг оролдсон тухай "www.dailymail.co.uk” мэдээллээ. Тус улсын цагдаа нар дүрвэгсдийг хяналтадаа авахын тулд цахилгаан бороохой зэргийг ашигласан бөгөөд дүрвэгсдийг буцаад хуарандаа очихыг уриалсан байна. Дүрвэгсэд цагдаа нарын үгийг үл тоон эсэргүүцэл үзүүлж, зугтаажээ.

Энэ үеэр Унгарын нэгэн телевизийн зураглаач бүсгүй хүүхэд тэврээд гүйж буй дүрвэгчийг дэгээдэж унагаасан байна. Зураглаачийн харгис үйлдлийг өөр нэгэн хэвлэлийн зураглаач авсан бөгөөд өөрийн твиттертээ "Аймшигтай юм” гэж жиргэжээ.

Ямар ч шалтгаангүй дүрвэгчийг унагаасан зураглаач эмэгтэй "N1” телевизийн ажилтан болохыг тогтоосон аж. Энэхүү бичлэг интернэт ертөнцөд тархсаны дараа түүнийг ажлаас нь чөлөөсөн тухайгаа тус телевиз өөрийн фэйсбүүк хуудсаараа дамжуулан мэдэгдсэн байна.