Хью Жекман далайн шуурганы үеэр хүмүүсийн амь аврав VIDEO

Холливудын зарим од дэлгэцэн дээр төдийгүй бодит амьдралд ч баатар байдгийг жүжигчин Хью Жекман баталлаа. Австралид  гэр бүлтэйгээ амарч байгаа Хью далайн шуурганы үеэр эхлээд хүүгээ аварчээ. 15 настай хүү Оскараа уснаас татаж гаргасны дараа Хью хүчтэй урсгал хүмүүсийг задгай далай руу хамж байгааг харлаа.

Алдартай жүжигчин Хью эхлээд нэгэн охиныг давалгаанаас хамгаалж, дараа нь өөр нэг эрийг эрэгт хүрэхэд тусалсан талаар "Guardian" мэдээлжээ. Аврах албаныхан энэ үеэр эрэг дээр зогсоод харж байсан бөгөөд Хью хүмүүсийг аварч эхлэхэд л ажилдаа орсон гэж гэрчийн этгээдүүд өгүүлэв. 

"20-хон минутын өмнө биднийг усанд орж байхад ямар ч аюул байгаагүй. Гэтэл гэнэт асар өндөр давалгаа гарч ирсэн, Хью огт сандралгүй тайвнаар хүмүүст тусалж, эрэгт хүргэж байлаа" хэмээн нэгэн гэрч ярилаа. Энэ явдлын дараа Сиднейн наран шарлагын газрыг хаасан гэж "Guardian"-д бичжээ.

Хью Жекманыг манайхан "Х хүмүүс" киноны дүрээр андахгүй. Хью Жекман түүнчлэн "Ван Хельсинг", "Австрали", "Амьд ган" зэрэг олон алдартай кинонд тоглосон билээ.