Тушаал биелүүлсэнгүй хэмээн дүлий хүнийг цагдаа нар буудан хөнөөжээ
Оклахомад цагдаа нар өөрсдийнх нь командыг биелүүлсэнгүй хэмээн нэгэн хүнийг буудан хөнөөсөн байна. Харин тэдний буудсан хүн сонсголгүй дүлий байсан нь хожим тодорсон аж.
Уг хэргийн гэрч болох хөршүүд нь хэв журам сахиулагчдыг анхааруулах гэж оролдоод дийлээгүй юм байна. Тэд уг хүнийг таг дүлий гэдгийг цагдаагийнханд хашгиран мэдэгдсэн боловч нөгөөдүүл нь огт тоогоогүй гэнэ.
Хэв журам сахиулагчид гэмт этгээдүүд сууж явсан байж болзошгүй нэгэн машиныг хайж явжээ. Ингээд Оклахома хотын зүүн өмнө хэсэг дэх нэгэн гудамжинд дүрсэлсэн машинтай төстэйг олсон байна.
Уг машины дэргэд гартаа саваа барьсан нэгэн эр зогсож байжээ. Тэр хүн цагдаагийнханд сэжигтэй санагдсан бөгөөд тэдний хэлсэн тушаалыг огт биелүүлэхгүй байсан аж. Иймд цагдаа нар түүн рүү гал нээсэн гэнэ.
Амь үрэгдсэн эр латин америк хүн байсан бөгөөд төлөв түвшин, ажилсаг нэгэн байсан тухай хөршүүд нь батлан өгүүлжээ. Сонсголгүй дүлий хүнийг буудан хөнөөсөн цагдаагийн офицер ажлаасаа халагдсан бөгөөд мөрдөн шалгагдаж байгаа аж.
Д.Мөрөн
Эх сурвалж: ZONE.MN
