Илтгэл тавих үеэрээ профессорынхоо өмнө тайчжээ
Нью-Йорк мужийн Итака хот дахь Корнелл их сургуулийн төгсөх ангийн оюутан Летитиа Чай илтгэл тавих үеэр профессор багш нь түүнийг зохисгүй хувцасласан байна гэж шүүмжилсний хариуд үзэл бодлоор ялгаварлан гадуурхаж, дарангуйлах байдлыг эсэргүүцэн гадуур хувцсаа тайлсан байна.
Түүнийг илтгэл тавьж байх үеэр нь профессор багш нь "Богино өмд чинь дэндүү оготор байна” гэж хэлжээ. Чай энэ талаар фэйсбүүктээ "Тэр намайг ангийнхны минь өмнө шүүмжилсний дараа тэд бүгдээрээ илтгэл рүү минь биш бие рүү минь цоо ширтэцгээж эхэлсэн. Би үнэхээр гайхсан тул яахаа мэдэхээ больчихсон” хэмээжээ. Мөн тэрээр тэнд байсан зарим оюутнууд түүнийг илүү хуучинсаг хувцаслах ёстой гэсэн багштай санал нийлж байсан гэнэ.
Чай дотуур хувцастайгаа илтгэлээ тавьж дуусгаад ангиас гарсны дараа багш нь түүний араас очиж ээж нь түүний хувцаслалтын талаар юу гэх байсныг асуужээ. "Ээж маань юу гэх байсан бэ гэж үү? Миний ээж бол феминист, эмэгтэйчүүдийн эрх, хүйсийн ялгавартай харьцааны талаар багшилдаг профессор хүн. Тэр бүхий л амьдралаа хүйсийн тэгш байдлыг хангахын төлөө зориулж байгаа. Тийм болохоор тэр миний хувцаслалтыг энгийн зүйл гэж үзэх байсан” хэмээжээ.
