Бангкокийн дэлбэрэлтийн сэжигтний бичлэгийг цацлаа
Даваа гаригийн орой Тайландын нийслэл Бангкок хотод хүчтэй дэлбэрэлт болж 20 хүн амиа алдсан харамсалтай хэрэг гарсан. Дэлбэрэлтийн улмаас 120 гаруй хүн гэмтэж бэртсэн бөгөөд хяналтын камерын бичлэг цацагджээ.
Бичлэгт харагдаж байгаачлан шар богино ханцуйтай цамц өмссөн эрэгтэй Эраван бунхны орчим үүргэвчээ орхиж байгаа нь харагдана. Түүнчлэн өчигдөр Бангкокийн усан боомтод хэн нэгэн тэсрэх бодис шидсэн хэрэг гарсан хэдий ч азаар бэртэж гэмтсэн хүн гараагүй аж.
Эхний халдлагын үеэр амиа алдсан хүмүүсийн дунд БНХАУ, Хонконг, Их Британи, Индонез, Малайз, Сингапурын иргэд байжээ. Хяналтын камерын бичлэгт сэжигтэн этгээд цүнхээ бунхны дотор болгоомжтой тайлж тавиад, хэргийн газраас даруй явж байгааг харуулсан юм.
- CCTV агентлагийн цацсан хяналтын камерын бичлэг -
Үүнээс хэдхэн минутын дараа түүний цүнхээ тавьсан газарт бөмбөг дэлбэрчээ. Тайландын ерөнхий сайд Прают Чан Оча "Халдлагын сэжигтэн энэ байна... бид энэ залууг хайж байна” гэж мэдэгдсэн юм.
Цагдаагийн газрын мэдээлснээр халдлагыг зохион байгуулсан этгээд Тай үндэстэн биш төдийгүй ашигласан тэсрэх бөмбөг нь өмнө нь Тайландын хэт даврагсдын ашиглаж байснаас өөр төрлийнх гэжээ.
Эх сурвалж: BBC
