Оросуудын “Манайхны төлөө”,”Парисын төлөө” гэсэн бөмбөг

Сири, Иракын нутаг дахь алан хядагч "Лалын улс” зэвсэгт бүлэглэлийн байрлалд агаараас цохилт өгч байгаа оросын нисгэгчид "Манайхны төлөө”, "Парисын төлөө” гэсэн бичигтэй бөмбөг хаяж байгаа дүрс бичлэгийг ОХУ-ын Батлан хамгаалахын интернет хуудсанд байрлуулжээ.
"Хмеймимд байрлаж байгаа манай баазын нисгэгч, техникчид алан хядагчдад өөрийн илгээмжээ илгээж байна” гэж энд бичжээ.
Оросын цэргийн агаарын хүчнийхэн Синайн хойгт аравдугаар сарын 31-нд А-321 онгоцыг дэлбэлж 224 хүний аминд хүрсэн явдал, арваннэгдүгээр сарын 14-нд Парист хэд хэдэн халдлага үйлдэж 130 хүний аминд хүрч, 300 хүнийг шархдуулсны нь төлөө "лалын улс” зэвсэгт бүлэглэлийнхэнд ийм бичиг бүхий бөмбөг "илгээж” байгаа юм байна.