"УУЧЛААРАЙ... ҮҮЛ ДАРГА АА. БИ Ч БАС "ЛАЛАР"-ЫН НЭГ НЬ"

Ардчилсан холбоог үүсгэн байгуулалцсан, ардчилагчдын алтан хараацай, Монгол Улсын баатар, Улаанбаатар хотын захирагч Эрдэнийн Бат-Үүл сошиал орчинд идэвхтэй байдаг хүмүүсийг харин ч нэг нүүр хийх газаргүй болголоо. Даяаршиж буй нийгэмд сошиал орчин хүн бүрийн өдөр тутмын хэрэглээ болчихсон нь түүний бухимдлыг дээд цэгт нь хүргэжээ. Монгол Улсын эрхэм баатар маань UBS телевизийн "Кофе юу, цай юу" нэвтрүүлэгт орох үедээ "Гивлүүртэй лалруудтай адилхан интернэтийн лалрууд нь маш их байгаа байхгүй юу" гэсэн нь ард түмний нүдийг бүлтийлгэж, чихийг дэлдийлгэв. Ингэснээрээ тэрбээр амиа золин байж тэмцсэн ардчиллаа үгүйсгээд зогсохгүй, журмын нөхдөө ч "лалар" болж харагдууллаа. Ардчилсан намын дарга, УИХ-ын дарга З.Энхболд сошиал орчинд маш идэвхтэй байдаг нэгэн. Тэгвэл Үүл даргын хэлснээр бол З.Энхболд "лалар" болж таарах нь. Мөн Монгол Улсын Ерөнхийлөгч Ц.Элбэгдорж "лалар"-уудтай уулзаад бөөн юм болсон биз дээ. Цаашилбал Ц.Элбэгдорж ч твиттер, фэйсбүүк орчинд идэвхтэй байдаг. Үүл даргынхаар бол Ерөнхийлөгч нь мөн л "лалар" болж таарах нь. Улстөрийнхөн дундаас сошиал орчинд хамгийн идэвхтэй байдаг нөхдүүд нь АН-ынхан. Тэгэхээр АН-ынхан тэр чигээрээ "лалар"-ууд болж байгаа юм.

Гивлүүргүй, гивлүүргүй "лалар"-ууд монголоор нэг бий. Компьютерийн ард ч суудаг нь байна, суудаггүй нь ч бий. Гэхдээ л мундаг том улстөрчийн амнаас ийм үг гарч байна гэж бодохоор л гол харлаад байх юм. Бүр Уланбаатар хотын дарга хүн цэнхэр дэлгэцээр "лалар" яриад, хотынхоо иргэдийг доромжлоод сууж байгаа нь ардчиллын буян. Тэр ард түмнээ доромжлохын төлөө тэмцсэн юм байна. Ард түмэн түүнд доромжлуулахын төлөө сонгосон юм байна. Нийслэл хотод амьдран суудаг иргэдийн 90 гаруй хувь нь их баг хэмжээгээр интернэт орчин ашигладаг гэсэн судалгаа бий. Тэгвэл нийслэлийн захирагчийн хэлснээр тэр 90 гаруй хувь нь "лалар" болчихлоо. Уучлаарай... Үүл дарга аа. Би ч бас тэр "лалар"-уудын нэг нь... Та интернэт ашигладаггүй байж болно. Таны хүүхэд, хүүхдийн хүүхэд ашигладаг л байж таараа. Тэд нар чинь бас "лалар"-уудын тоонд багтах уу... "Ам алдвал барьж болдоггүй, агт алдвал барьж болдог" гэсэн үг бий. Хэлсэн үгэндээ эзэн, идсэн хоолондоо сав болно шүү, Үүл дарга аа...

С.БУЯН