Японд 6.4 магнитудын хүчтэй газар хөдлөлт болжээ

Японы өмнөд хэсэгт орших Кюшю аралд өчигдөр /04.14/ 6.4 магнитудын хүчтэй газар хөдлөлт болсон талаар BBC мэдээллээ.

Газар хөдлөлт орон нутгийн цагаар 21.26 цагийн үед болсон бөгөөд голомт нь Күмамото хотоос 11 км-ийн зайд байсан хэмээн АНУ-ын Геологийн судалгааны төвөөс мэдээллээ.

Тус байгалийн гамшгийн улмаас 19 байшин нурж, есөн хүн амь үрэгдэж, 250 гаруй хүн гэмтэж бэртсэн байна.

Түүнчлэн Кюшю арлын Машико хотын 1000 гаруй оршин суугчийн гэр орон сүйдсэний улмаас гудамжинд хоноход хүрчээ.

Газар хөдлөлтийн улмаас галт тэрэгний хөдөлгөөн зогсоож, 16 мянга гаруй айл цахилгаан эрчим хүчгүй болсон гэж Japan Times дамжууллаа.

Японы Ерөнхий сайд Шинзо Абэ шуурхай хуралдаан зохион байгуулж, иргэдийн аюулгүй байдлыг хангахын тулд шаардлагатай бүх арга хэмжээг авахыг үүрэг болгожээ.

Газар хөдлөлтийн хэлбэлзлийн хүчийг XII баллын шаталбараар ажиглалтын цэг бүрт тодорхойлдог бол магнитуд нь газар хөдлөлтийг бүртгэх багажинд тэмдэглэгдсэн газар хөдлөлтийн голомтын хүч бөгөөд тоон хэмжигдэхүүн юм. Балл нь тус бүс нутгийн хувьд зай болон геологийн нөхцөлөөс хамааран янз бүрийн утгатай байдаг бол магнитуд нь тухайн газар хөдлөлтийн хувьд зөвхөн нэг л утга агуулсан байдаг.

Эх сурвалж: ВВС