Үдээсээ цоожлох оо?! Сонин л юм
Гутлын үдээсний төгсгөл хэсэгт байх дараалсан хоёр нүхний учрыг тэр болгон хүн мэддэггүй. Үнэхээр сонирхолтой, бас ухаалаг зорилгоор хийгдсэн нүх гэдгийг доорх бичлэгээс л мэдлээ. Ихэвчлэн гүйлтийн, явган аяллын болон спортын бүх төрлийн гутланд байдаг энэ нүхийг бид жирийн л нэг үдээсний нүх мэтээр хэрэглэдэг.
Тэгвэл энэ нүх нь ''lace lock'' буюу "үдээсний цоож" гэж нэрлэгддэг байна. Үдээсээ хоёр нүхэнд хийж гогцоо гарган, гарсан нүхнүүдэд үдээсээ сүлжэн хийж дараа нь жирийн үддэг байдлаараа үдээсээ үднэ. Үдээсийг чангалах явцад дээш бус доош нь татахыг санаарай.
Яагаад үдээсийг цоожлох ёстой гэж? Иймэрхүү нүх бүхий спортын гутлыг хүмүүс ихэвчлэн хол газар алхах, гүйх, дасгал хийх, уул хаданд авирах гэх мэтэд өмсдөг. Заримдаа гутлын үдээс суларснаас гутал холхинож, хөлийн өсгий, хуруу, хажуу, цаашлаад хөл урагш хойш гүйснээс улбаалан уланд ч цэврүү үсрэх нь бий. Ядаж байхад цэврүү хагарч идээлнэ, үрэвсэнэ, цус гарч хүндэрнэ, өвдөнө. Эцэс сүүлд нь бид ягаан, бор сорвитой үлддэг. Тэгвэл энэ бүхнээс сэргийлэхийн тулд л үдээсний цоож зориулагдсан аж.
Үдээсээ цоожилсноор хөл гуталдаа урагш хойш, дээш, доош холхихгүй, хөдлөхгүй, яг л таны хөлний нэг эд эс мэт байх юм. Мөн хамгийн том эрсдэл болох шагай булгарахаас найдвартай хамгаалдаг гэнэ. "Lace lock"-ны нүх байхгүй ч ямар ч гутлын дээд дөрвөн нүхийг хэрэглэн үдээсээ ''цоожилж'' болно. Энэ үйлдлийг хэрхэн зөв хийх тухай доорх бичлэгээс харна уу!
