iOS төхөөрөмжийг гацаах бичлэгээс болгоомжлоорой

Хортой программын цар хүрээ улам нэмэгдэж, энгийн нэгэн бичлэг хүртэл таны хэрэглэж буй төхөөрөмжийг гэмтээх чадалтай болжээ. Macrumors-т бичсэнээр интернетэд байршуулсан нэгэн бичлэг iOS үйлдлийн системтэй төхөөрөмжийг гацааж, хэрэглэгч заавал "hard reset” хийх шаардлагатай болно гэсэн байна.

Хэрэглэгч Safari веб хөтчөөр дамжуулан тухайн бичлэгийг ачаалласан тохиолдолд эхлээд хэвийн мэт боловч үйлдлийн систем удааширсаар, төд удалгүй бүрэн гацах аж.

EverythingApplePro нэртэй Youtube сувагт энэхүү үйл явц хэрхэн явагдаж буйг харуулжээ. Энэ алдаа зөвхөн сүүлийн үеийн гэлтгүй бүр iOS 5 үйлдлийн системийг хүртэл гацаах чадалтай бөгөөд iOS 10.2 үйлдлийн системтэй хэрэглэгч ч хохирогч болж болно.

Одоогоор vk.com, testtrial.site90.net гэсэн хаягууд дээр энэхүү бичлэг байрлаж байгаа бөгөөд хэрэглэгчид бүрэн итгэлтэй хаяг л биш бол ямар нэгэн бичлэгийг тоглуулж үзэхгүй байх нь өөрийгөө эрсдэлээс хамгаалах нэг арга юм.

Түүнчлэн энэ бичлэгийг өөр сайт дээр байршуулах, URL хаяг богиносгогч ашиглан жинхэнэ хаягийг нь нуух зэргээр тараах боломжтой гэдгийг мэдэхэд илүүдэхгүй.